لاہور: صوبہ پنجاب کے دارالحکومت لاہور میں ٹرک نے موٹر سائیکل رکشے کو روند ڈالا، حادثے میں 5 افراد جاں بحق ہوگئے۔
تفصیلات کے مطابق لاہور میں ڈیفنس روڈ پر تیز رفتار ٹرک نے موٹر سائیکل رکشے کو روند ڈالا، افسوس ناک حادثے میں 5 افراد موقع پر ہی جان کی بازی ہار گئے۔
پولیس حکام کا کہنا ہے کہ حادثے میں جاں بحق ہونے والے افراد کی لاشوں کو اسپتال منتقل کر دیا گیا جہاں قانونی کارروائی کے بعد لاشوں کو ورثا کے حوالے کیا جائے گا۔
اس سے قبل رواں سال یکم مارچ کو لاہور کے علاقے بھاٹی گیٹ میں پیر مکی کے قریب تیز رفتار ٹرک نے موٹر سائیکل پر سوار 3 بچوں کو کچل دیا تھا، تینوں بچے طبی امداد ملنے سے پہلے ہی دم توڑ گئے تھے۔
یاد رہے کہ رواں برس 31 مئی کو صوبہ پنجاب کے ضلع خانیوال کے قریب لاہور سے ملتان جانے والی مسافر بس الٹ گئی تھی، حادثے میں 6 افراد جاں بحق جبکہ 25 زخمی ہوگئے تھے۔
