لاہور : پولیس مقابلے میں بچھوگینگ کا سرغنہ ساتھیوں کی فائرنگ سے ہلاک ہوگیا ، بچھو گینگ کے سرغنہ کی موت کا مقدمہ تھانہ ڈیفنس سی میں درج کرلیا گیا۔
تفصیلات کے مطابق پنجاب کے دارلحکومت لاہور میں بچھوگینگ کا سرغنہ مدثرعرف بچھو ساتھیوں کی فائرنگ سے ہلاک ہوگیا، ایس پی کینٹ عیسی سکھیرا نے بتایا کہ 2موٹر سائیکلوں پر سوار 4 ڈاکوؤں نے برکی کے علاقےمیں واردات کی اور ڈیفنس سی کےعلاقےمیں پہنچنے پر پولیس کو دیکھتے ہی ڈاکوؤں نے فائرنگ کردی۔
عیسی سکھیرا کا کہنا تھا کہ ڈاکوؤں کی اندھا دھند فائرنگ سے مدثرعرف بچھو ہلاک ہوگیا، مدثرعرف بچھولاہوراورقصور پولیس کو مطلوب تھا۔
حکام نے بتایا کہ ہلاک ڈاکو نے 2017 میں پولیس اہلکار کو شہید بھی کیا تھا جبکہ راہزنی اورڈکیتی کی درجنوں وارداتوں میں ریکارڈیافتہ تھا تاہم فرار ڈاکوؤں کی گرفتاری کیلئے چھاپے مارے جا رہے ہیں۔
دوسری جانب پولیس مقابلہ میں بچھو گینگ کے سرغنہ مدثر کی موت کا مقدمہ تھانہ ڈیفنس سی میں درج کرلیا گیا ہے، ایف آئی آر میں کہا گیا ہے کہ گزشتہ رات ریکارڈیافتہ بچھو گینگ نے برکی میں واردات کی، اس دوران ٹی بلاک فیز 7 میں ملزمان سے مقابلہ ہوا۔
ایف آئی آر کا کہنا تھا کہ 4ڈاکوؤں نے گشت پر موجود پولیس پارٹی پر فائرنگ کی، جوابی فائرنگ میں ایک ڈاکو ہلاک، 3 فرار ہوگئے۔
