لاہور کے علاقے ڈیفنس میں سیلون مالکن پر فائرنگ کا واقعہ نیا رخ اختیار کر گیا کیونکہ خاتون پر حملہ کروانے والا اس کا شوہر نکلا۔
متاثرہ خاتون زینب نے ویڈیو پیغام میں انکشاف کیا کہ شوہر نے قتل کروانے کی کوشش کی اور 2 ماہ سے دھمکیاں دے رہا تھا، مجھے لگا میرے بچوں کا باپ میرے ساتھ ایسا نہیں کر سکتا۔
زینب نے بتایا کہ اسپتال سے ویڈیو ریکارڈ کر رہی ہوں دوبارہ دھمکیاں مل رہی ہیں، ملزم کو تاحال گرفتار نہیں کیا جا سکا لہٰذا پولیس مجھے سکیورٹی فراہم کرے۔
چند روز قبل ڈیفنس میں سیلون کے باہر نامعلوم افراد کی فائرنگ سے زینب زخمی ہوئی تھیں۔ پولیس کا کہنا تھا کہ حملہ آوروں نے خاتون کو کار سے اترتے وقت نشانہ بنایا۔
فائرنگ کے بعد موٹر سائیکل پر سوار 2 حملہ آور موقع سے فرار ہوگئے تھے۔ زینب کو 6 گولیاں لگی تھیں جنہیں طبی امداد کیلیے جنرل اسپتال منتقل کیا گیا تھا جہاں وہ اب تک زیرِ علاج ہیں۔ خاتون کے چہرے پر ایک گولی لگی جبکہ باقی گولیاں کندھے پر لگی ہیں۔
واقعے کی سی سی ٹی وی فوٹیج سامنے آئی تھی جس مین دیکھا گیا کہ زینب کی گاڑی بیوٹی سلون کے سامنے آکر رکتے ہی دو حملہ گاڑی کے قریب آتے ہیں۔
ایک حملہ آور موٹر سائیکل سے اتر کر گاڑی کا دروازہ کھولتا ہے اور زینب پر اندھا دھند فائرنگ کرتا ہے۔ فائرنگ کے بعد دونوں حملہ آوروں کو فرار ہوتے بھی دیکھا گیا۔ دونوں نے کالے رنگ کے کپڑے اور چہرے پرماسک لگا رکھے تھے۔
