لاہور: 8مرلہ مکان کے تنازعہ پر دو گروپوں کی فائرنگ سے پانچ افراد جاں بحق جبکہ چار زخمی ہوگئے۔ پولیس نے ایک ملزم کو زخمی حالت میں اسپتال سے گرفتار کرلیا۔
تفصیلات کے مطابق لاہور کے علاقے باٹا پور میں قریبی رشتے داروں میں گولیاں چل گئیں، آٹھ مرلے کا مکان5جانیں لے گیا، چار میں سے ایک زخمی اسپتال سے گرفتار کرلیا گیا۔
اس حوالے سے پولیس کا کہنا ہے کہ واہگہ بارڈر سے کچھ فاصلے پر واقع ڈھیال پنڈ کے قریب دو گروپوں میں 8 مرلہ کے مکان کا تنازعہ چلا آرہا ہے۔
چند روز قبل ملزمان نے فائرنگ کر کے امجد گروپ کے ایک شخص کو زخمی کیا، جس کے بدلے میں آج موقع پاکر رفاقت گروپ نے پانچ افراد کو قتل کردیا۔
پولیس کے مطابق دونوں پارٹیاں قریبی رشتہ دار ہیں، معمولی تنازعہ پر دو طرفہ فائرنگ ہوئی۔ دوسری جانب مقتولین کے ورثاء نے الزام لگایا ہے کہ قتل پولیس کی غفلت کے باعث ہوئے۔
پولیس نے لاشیں مردہ خانہ منتقل کرکے مزید تفتیش کا آغاز کردیا ہے، ایک زخمی ملزم رفاقت کو میو ہسپتال سے گرفتار کرلیا ہے، دیگر ملزمان کی تلاش میں چھاپے مارے جارہے ہیں۔
