لاہور کے علاقے ہنجروال میں بہنوئی نے فائرنگ کرکے دو سالوں کو قتل کردیا۔
اے آر وائی نیوز کے مطابق لاہور کے علاقے ہنجروال الحمد پارک کے رہائشی محمد علی کی بیٹی نے کچھ عرصہ قبل فہد نامی شخص سے پسند کی شادی کی تھی، لڑکی کو والدین گھر واپس لے آئے جس کا ملزم فہد کو رنج تھا۔
پولیس کے مطابق رات کے وقت محمد علی کے دو بیٹے دودھ کی دکان پر کام کررہے تھے کہ ملزم نے ساتھیوں کے ہمراہ فائرنگ کرکے دونوں کو قتل کردیا۔
والد محمد علی کا بتانا ہے کہ مزمل اور مدثر میرے دو ہی بیٹے تھے جبکہ پانچ بیٹیاں ہیں۔
پولیس نے جائے وقوعہ سے شواہد اکٹھے کرکے مقتولین کی لاشوں کو ضابطے کی کارروائی کے لیے اسپتال منتقل کردیا ہے۔
پولیس کا کہنا ہے کہ ملزم کے خلاف مقدمہ درج کرکے گرفتاری کے لیے ٹیمیں تشکیل دے دی گئی ہیں۔
