لاہور: پنجاب کے شہر لاہور میں گزشتہ روز گھر کی دہلیز پر قتل ہونے والی حرا کے قاتل کو پولیس نے گرفتار کرلیا۔
تفصیلات کے مطابق لاہور پولیس نے گزشتہ روز قتل ہونے والی 24 سالہ حرا کے قتل کا معمہ حل کرلیا، پولیس کا کہنا ہے کہ مقتولہ حرا کو قتل کرنے والا اس کا بہنوئی ہے، ملزم عدنان نے ذاتی رنجش پر حرا کو قتل کیا۔
پولیس کے مطابق ملزم کو حرا کے موبائل فون سے ٹریس کیا گیا، ملزم عدنان واردات کے بعد ایمن آباد فرار ہوگیا تھا۔
نمائندہ اے آر وائی نیوز بابر خان کے مطابق مقتولہ حرا کی آج شادی تھی، پولیس کی جانب سے ملزم عدنان کے ساتھی کی تلاش کے لیے بھی چھاپے مارے جارہے ہیں۔
پولیس کا کہنا ہے کہ ملزم احسن مقتولہ کو پسند کرتا تھا جس کی رواں ہفتے شادی طے تھی، ملزم نے وقوعہ کی شام حرا کو فون کرکے پارک بلایا، ملزم احسن اور حرا کے درمیان تلخ کلامی ہوئی اور اس نے سیدھے فائر مار کر حرا کو قتل کردیا۔
مزید پڑھیں: لاہور، شادی سے 3 روز قبل 24 سالہ لڑکی گھر کی دہلیز پر قتل
واضح رہے کہ گزشتہ روز لاہور کے علاقے گلبرگ میں نامعلوم موٹر سائیکل سوار مسلح افراد نے شادی سے تین روز قبل فائرنگ کرکے 24 سالہ حرا کو قتل کردیا تھا۔
والد نے مزاحمت کی تو حملہ آوروں نے انہیں بھی تشدد کا نشانہ بنایا تھا اور زبردستی لڑکی کو اپنے ساتھ لے گئے اور کچھ دور لے جاکر گولیاں ماردیں تھیں۔
پولیس نے مقتولہ کے والد ریحان حسین کی مدعیت میں مقدمہ درج کرکے تحقیقات شروع کی تھیں، وزیراعلیٰ پنجاب عثمان بزدارنے سی سی پی او لاہور سے واقعے کی رپورٹ طلب کی تھی۔
