لاہور: موٹر وے پولیس نے قومی شاہراہ پر روشن بھیٹ سے 2 لاپتہ کم عمر بھائیوں کو والدین سے ملوادیا۔
تفصیلات کے مطابق لاہور موٹروے پولیس نے انسانیت کی مثال قائم کر دی، 6 اور 8 سالہ بچے گھر کا راستہ بھول کر قومی شاہراہ پر پریشان حال میں اپنا گھر ڈھونڈ رہے تھے۔
ترجمان موٹروے پولیس کا کہنا ہے کہ دونوں بچے مدرسے سے بھاگ کر آئے تھے، انتھک کوشش کے بعد بچوں کے والد سے رابطہ ممکن ہوا۔
ترجمان نے مزید بتایا کہ قانونی کارروائی کے بعد بچوں کو والد کے حوالے کردیا گیا ہے، والدین نے گمشدہ بچے مل جانے پر موٹروے پولیس کو قابل فخر ادارہ قرار دیا ہے۔
اس سے قبل تین دن سے لاپتہ ذہنی مریضہ کو خاندان سے ملوایا تھا، ترجمان موٹروے پولیس نے بتایا تھا کہ موٹروے پولیس کو لاہور کے قریب ایم 3 پر اکیلی خاتون پریشان حالت میں ملی تھی۔
