لاہور: صوبہ پنجاب کے دارالحکومت لاہور میں تیزرفتاری کے باعث ٹریفک حادثے میں موٹرسائیکل سوار بچہ جاں بحق جبکہ دوسرا زخمی ہوگیا۔
تفصیلات کے مطابق لاہور کے علاقے شاہ عالم چوک کے قریب تیزرفتار ٹرک کی زد میں آکر موٹرسائیکل سوار بچہ جاں بحق جبکہ دوسرا زخمی ہوگیا۔
پولیس حکام کے مطابق حادثے میں جاں بحق بچے کی شناخت 7 سالہ احسان کے نام سے ہوئی ہے جبکہ زخمی کی شناخت 14 سالہ ابراہیم کے نام سے ہوئی۔
پولیس حکام کا کہنا ہے کہ حادثے میں زخمی ہونے والے بچے کو اسپتال منتقل کردیا گیا ہے جہاں اسے طبی امداد دی جا رہی ہے۔
لاہور کے علاقے شاہ عالم چوک میں رواں ہفتے ٹریفک حادثے میں بچے کی موت کا یہ دوسرا واقعہ ہے، ٹریفک حادثےمیں بچے کے جاں بحق ہونے کے خلاف اہل علاقہ نے شدید احتجاج کیا۔
لاہور: میٹرو بسیں آپس میں ٹکراگئیں‘ خاتون جاں بحق‘ 10 افراد زخمی
یاد رہے کہ گزشتہ ماہ لاہور کے فیروز پور روڈ پرگجومتہ کے قریب دو میٹرو بسیں آپس میں ٹکرا گئیں، حادثے میں خاتون جاں بحق اور 10 افراد زخمی ہوگئے تھے۔
واضح رہے کہ گزشتہ سال نومبر میں لاہور کے علاقے رائیونڈ روڈ پر بحریہ آرچرڈ کے قریب منی ٹرک تیز رفتاری کے باعث بے قابو ہوکر الٹ گیا تھا جس کے نتیجے میں 7 افراد جاں بحق جبکہ 20 سے زائد زخمی ہوگئے تھے۔
