لاہور: پنجاب کے شہر لاہور اور فیصل آباد میں طلبا کا احتجاج پرتشدد ہوگیا، مشتعل مظاہرین نے یونیورسٹی کے دروازے کو آگ لگادی۔
اے آر وائی نیوز کی رپورٹ کے مطابق لاہور میں مشتعل طلبا نے یونیورسٹی کے دروازے کو آگ لگادی، احتجاجی طلبا پر پولیس نے لاٹھی چارج کیا جس کے نتیجے میں دو طلبا زخمی ہوگئے جبکہ متعدد طلبا کو گرفتار کرلیا گیا، واضح رہے کہ طلبا مطالبہ کررہے ہیں کہ پڑھائی کی طرح امتحان بھی آن لائن لیے جائیں۔
ذرائع کے مطابق لاہور کی نجی جامعہ یونیورسٹی آف سینٹرل پنجاب کے طلبا نے آن لائن امتحانات کے لیے پرتشدد احتجاج کیا، مشتعل طلبا نے ٹائر جلائے اور انتظامیہ کے خلاف نعرے بازی کی۔
ادھر شوکت خانم روڈ پورا دن میدان جنگ بنا رہا، گارڈ اور طلبا نے ایک دوسرے پر پتھر، ڈنڈے اور لاٹھیاں برسائیں، پولیس نے طلبا کو منتشر کردیا۔
واضح رہے کہ وزیر تعلیم شفقت محمود کا کہنا تھا کہ آن لائن امتحانات کے حوالے سے فیصلہ یونیورسٹیز نے کرنا ہے، وی سیز دیکھیں اس سال مخصوص حالات میں ممکن ہے تو آن لائن امتحانات کرالیں۔
دوسری جانب معاون خصوصی برائے سیاسی روابط شہباز گل کا کہنا ہے کہ سوشل میڈیا پر لاہور میں طلبا کے احتجاج میں ایک ہلاکت کی افواہ چل رہی ہے، یہ جھوٹی افواہ ہے، انتظامیہ معاملے کو ذمہ داری سے دیکھ رہی ہے۔
شہباز گل کا کہنا تھا کہ طلبا اور اساتذہ ہمار اثاثہ ہیں دونوں کی حفاظت ہر صورت کی جائے گی۔
ابھی سوشل میڈیا پر لاہور میں طلبہ احتجاج میں ایک ہلاکت کے بارے جھوٹی افواہ چل رہی تھی۔ یہ جھوٹی افواہ ہے۔ انتظامیہ اس سارے معاملے کو پوری زمہ داری سے دیکھ رہی ہے۔ ہمارے طلبہ اور اساتذہ ہمارا اثاثہ ہیں۔دونوں کی حفاظت ہر صورت کی جائے گی۔
— Dr. Shahbaz GiLL (@SHABAZGIL) January 26, 2021