لاہور: لانگ مارچ توڑ پھوڑ کیس میں لاہور پولیس نے ڈاکٹر یاسمین راشد اور شفقت محمود سمیت پی ٹی آئی رہنماؤں کو بے قصور قرار دے دیا۔
تفصیلات کے مطابق لانگ مارچ کے دوران توڑ پھوڑ، سرکاری املاک کو نقصان پہنچانے کے کیس کی سماعت آج سیشن عدالت لاہور میں ہوئی، لاہور پولیس نے پی ٹی آئی رہنماؤں کو بے قصور قرار دے دیا۔
پولیس نے کہا کہ اس سلسلے میں رپورٹ انسداد دہشت گردی کی عدالت میں جمع کرا دی گئی۔
عدالت میں تحریک انصاف کے 13 رہنماؤں نے ضمانت کی درخواستیں واپس لے لیں، وکیل پی ٹی آئی نے کہا کہ پولیس نے تفتیش میں بے گناہ قرار دے دیا ہے اس لیے عدالت سے ضمانت کی درخواستیں واپس لینا چاہتے ہیں، جس پر عدالت نے بھی کیس نمٹا دیا۔
جن رہنماؤں نے درخواستیں واپس لیں ان میں حماد اظہر، یاسر گیلانی، یاسمین راشد، عندلیب عباس، جمشید چیمہ، مسرت جمشید، اعجاز چوہدری، ندیم عباس بارا، میاں اسلم، اور محمود الرشید و دیگر شامل ہیں۔
پی ٹی آئی رہنماؤں کے خلاف اسلام پورہ، شفیق آباد، شاہدرہ، گلبرگ اور بھاٹی گیٹ تھانے میں مقدمات درج تھے۔
پی ٹی آئی رہنما مراد راس نے کہا آج ہم سب پر دہشت گردی کی دفعات ختم ہو گئی ہیں، ہمارا فوکس عوام کو ریلیف دینے میں ہے، ہم جو بھی پنجاب کے عوام کے لیے کر سکیں گے، وہ نظر آئے گا۔
