لاہور: پنجاب پولیس نے صوبائی دارالحکومت کے علاقے ملت پارک سے گھر میں قید کی گئی 25 سالہ خاتون کو بازیاب کرالیا۔
نمائندہ اے آر وائی نیوز احمر کھوکھر کے مطابق لاہورکے علاقے میں واقع ملت پارک تھانے کی پولیس نے خفیہ اطلاع موصول ہونے پر کارروائی کی اور گھر سے 25 سالہ خاتون کو برہنہ حالت میں بازیاب کرایا۔
پولیس حکام کے مطابق بازیاب ہونے والی خاتون کی شناخت روشن آرا کے نام سے ہوئی جسے اُس کے بھائیوں نے گھر میں برہنہ حالت میں گزشتہ کئی روز سے قید کیا ہوا تھا۔
پولیس نے بازیاب کرائی جانے والی خاتون کو نفسیاتی اسپتال منتقل کردیا جبکہ اُس کے دو بھائیوں عامر اور مکرم کو حراست میں لے کر مقدمہ درج کرلیا۔
پولیس کے مطابق خاتون کے بھائیوں نے جادوکے نام پر گزشتہ ایک عرصہ سے اُسے گھر میں قید کیا ہوا تھا۔ روشن آرا اعلیٰ تعلیم یافتہ اور ایم ایس سی کی ڈگری حاصل کرچکی ہیں۔ پولیس نے ملزمان سے تحقیقات کا آغاز کردیا جس میں بڑی پیشرفت کا بھی امکان ہے۔
