لاہور: پاکستان سپر لیگ 10 کے فائنل میں سنسنی خیز مقابلے کے بعد لاہور قلندرز نے کوئٹہ گلیڈی ایٹرز کو شکست دے کر ٹائٹل اپنے نام کرلیا۔
تفصیلات کے مطابق پی ایس ایل میں شاندار اور سنسنی خیز فائنل کی روایت رہی ہے اور اس بار بھی کوئٹہ اور لاہور کے درمیان ہونے والا میچ نہایت سنسنی خیز ثابت ہوا، قلندرز نے صرف ایک گیند قبل اس دلچسپ مقابلے میں گلیڈی ایٹرز کو6 وکٹوں سے شکست دی
لیگ کی تاریخ میں لاہور قلندرز کی ٹیم تیسری بار پی ایس ایل کی فاتح بنی، اس سے قبل لاہور نے پاکستان سپر لیگ 7 اور 8 کا ٹائٹل بھی جیتا تھا۔
لاہور قلندرز نے 202 رنز کا ہدف ایک گیند پہلے سکند رضا کے چوکے کی مدد سے حاصل کیا، کوشال پریرا نے 30 گیندوں پر 61 رنز کی میچ وننگ اننگز کھیلی، سکندر رضا نے 7 گیندوں پر فتح گر 22 رنز اسکور کیے۔
محمد نعیم نے 46 اور عبداللہ شفیق نے 41 رنز بناکر جیت میں اپنا حصہ ڈالا، کوئٹہ گلیڈی ایٹرز کی طرف سے محمد عامر، فہیم اشرف، ابرار احمد اور عثمان طارق نے 1، 1 وکٹ حاصل کی۔
فاتحٹیم کے کوشال پریرا کو میچ وننگ اننگز پر مین آف دی میچ قرار دیا گیا جبکہ کوئٹہ گلیڈی ایٹرز کے حسن نواز کو پورے ٹورنامنٹ میں بہترین بیٹنگ کرنے پر پلیئر آف دی ٹورنامنٹ قرار دیا گیا۔
اس سے قبل کوئٹہ گلیڈی ایٹرز نے لاہورقلندرز کے خلاف پہلے بیٹنگ کرتے ہوئے 9 وکٹوں کے نقصان پر 201 رنز بنائے، نوجوان بیٹر حسن نواز نے 43 گیندوں پر 76رنز کی جارحانہ اننگز کھیلی اور اپنی ٹیم کی جانب سے ٹاپ اسکورر رہے۔
آل رائونڈر فہیم اشرف نے آخری اوور میں زبردست لاٹھی چارج کیا، انھوں نے سلمان مرزا کے آخری اوور میں 23 رنز بٹورے، فہیم اشرف نے صرف 8 بالز پر 28 رنز کی اننگز کھیلی۔
ان کے علاوہ فرنینڈو 29، رائلی روسو اور چندی مل 22، 22 رنز بناکر نمایاں رہے، کپتان سعود شکیل 4 اور فن ایلن 12 رنز بناسکے۔
دریں اثنا فائنل میں ٹاس جیتنے کے بعد گفتگو کرتے ہوئے کوئٹہ کے قائد سعود شکیل کا کہنا تھا کہ پریشر میچ میں بڑا ٹوٹل بنالیا تو حریف کو دباؤ میں لےسکتے ہیں، فائنل بہت بڑا میچ ہوتا ہے، پی ایس ایل فائنل کو بھی عام میچ کی طرح کھیلیں گے۔
کس ٹیم کا پی ایس ایل چیمپئن بننا مشکل ہے؟ سابق کرکٹر نے بتادیا
سعود شکیل نے کہا کہ پریشر میچ میں بڑا ٹوٹل بنالیا تو حریف کو دباؤ میں لےسکتے ہیں، وسیم جونیئر کی جگہ خرم شہزاد کو ٹیم میں شامل کیا ہے، وسیم جونیئر کو انجری ہوئی ہے۔
کپتان لاہور قلندرز شاہین شاہ آفریدی کا کہنا تھا کہ سب منجھے ہوئے اور تجربہ کار کھلاڑی ہیں، ٹیم میں شکیب الحسن کی جگہ سکندر رضا کو شامل کیا۔
پی ایس ایل10 فائنل میچ میں پاک بحریہ کو خراج تحسین پیش کیا جائےگا
