لاہور: پاکستان ریلویز نے جدت کی طرف ایک اور قدم اٹھاتے ہوئے لاہور ریلوے اسٹیشن پر عوام کیلیے بڑی سہولت کا آغاز کر دیا۔
لاہور ریلوے اسٹیشن پر ائیر کنڈیشنڈ واش رومز پبلک کیلیے کھول دیے گئے جس کی فیس 50 روپے ہوگی۔ ایگزیکٹو واش رومز صاف ستھرے اور جدید سہولیات سے آراستہ ہیں جن میں سینیٹائزر اور ہاتھ سُکھانے والی مشین بھی موجود ہے۔
پاکستان ریلویز کے منصوبے کے مطابق اگلے تین ماہ میں ملک بھر کے مزید 13 اسٹیشنوں پر ایگزیکٹو واش رومز کھول دیے جائیں گے۔
واش رومز میں سردیوں میں پانی گرم رکھنے کیلیے گیزر لگائے گئے۔ ان میں سفر سے تھکے مسافر فریش اپ بھی ہو سکیں گے اور شیمپو اور صاف ستھرا تولیہ بھی دستیاب ہوگا۔
واش رومز کی ایک اور خصوصیت یہ بھی ہے کہ ان میں ماؤں کی سہولت کیلیے بچوں کے ڈائپر تبدیل کرنے کیلیے اسٹینڈ بھی رکھا گیا ہے۔
صفائی ستھرائی کیلیے عملہ ہر وقت موجود ہوگا۔ مرد و خواتین مسافروں کیلیے الگ واش رومز اسٹیشن کے دونوں اطراف بنائے گئے ہیں۔
