لاہور: ننکانہ صاحب میں خاتون کو اغوا کرنے کی کوشش کرنے والے ملزم کو گرفتار کرلیا گیا۔
تفصیلات کے مطابق لاہور ورچوئل ویمن پولیس اسٹیشن میں ایمرجنسی ہیلپ لائن 15 پر کال موصول ہوئی، کالر نے بتایا ایک شخص اسلحے کے زور پر خاتون کو اغوا کرنے کی کوشش کر رہا ہے۔
ترجمان ورچوئل ویمن پولیس اسٹیشن کا کہنا تھا کہ ورچوئل ویمن پولیس اسٹیشن نے فوری طور پر پولیس کو موقع پر روانہ کیا، پولیس نے فوری کارروائی کرتے ہوئے ملزم کو تلاش کر کے گرفتار کر لیا۔
ترجمان کے مطابق ابتدائی معلومات کے مطابق ملزم ڈیڑھ ماہ سے خاتون کو بلیک میل کر رہا تھا، ملزم نے گھر میں داخل ہو کر اسلحے کے زور پر اغوا کرنےکی کوشش کی۔
ترجمان کا مزید کہنا تھا کہ خاتون کے شور مچانے پر ملزم جان سے مارنےکی دھمکی دیکر فرار ہو گیا تھا، پولیس نے ملزم کیخلاف مقدمہ درج کر کے قانونی کارروائی کا آغاز کر دیا۔
