لاہور: صوبہ پنجاب کے دارالحکومت لاہور میں نامعلوم افراد نے گھر میں زبردستی داخل ہوکر کر 28 سالہ خاتون کو فائرنگ کر کے قتل کردیا۔
تفصیلات کے مطابق 28 سالہ خاتون یاسمین کے لرزہ خیز قتل کا واقعہ لاہورمیں فیکٹری ایریا کے علاقے پنجاب ہاﺅسنگ سوسائٹی میں نامعلوم افراد کے ہاتھوں پیش آیا۔
فائرنگ کے واقعے کی اطلاع ملنے پر پولیس جائے وقوعہ پر پہنچی اور شواہد اکٹھے کرنے کے بعد لاش کو پوسٹ مارٹم کے لیے مردہ خانے منتقل کر دیا۔
پولیس حکام کے مطابق شبہ ہے کہ خاتون کو گھریلو رنجش پر قتل کیا گیا تاہم مختلف پہلوﺅں پر تحقیقات جاری ہے۔
علاوہ ازیں لاہور کے علاقے سبزی منڈی سے 50 سالہ نامعلوم شخص کی لاش برآمد ہوئی ہے۔ پولیس نے لاش کو پوسٹ مارٹم کے لیے مردہ خانے منتقل کردیا۔
یاد رہے کہ گزشتہ ماہ 5 جون کو لاہور کی نشتر کالونی میں نامعلو افراد نے گھر میں گھس کر فائرنگ سے میاں بیوی کو قتل کردیا تھا۔ واردات کے بعد ملزمان فرار ہونے میں کامیاب ہوگئے تھے۔
پولیس حکام کا کہنا تھا کہ فائرنگ کے واقعے میں مرنے والے میاں بیوی کی شناخت سلیمان اور نووین کے نام سے ہوئی ہے۔
