پاکستان شوبز انڈسٹری کی سینیئر اداکارہ لیلیٰ زبیری نے انکشاف کیا ہے کہ ماضی میں انہیں بالی ووڈ کے مقبول اداکار راج کپور نے اپنے ساتھ فلم میں کام کرنے کی پیش کش کی تھی لیکن انہوں نے انکار کردیا۔
حال ہی میں اداکارہ لیلیٰ زبیری نے نجی ٹی وی چینل کے پروگرام میں شرکت کی جہاں انہوں نے مختلف معاملات پر کھل کر بات کی۔
انہوں نے بتایا کہ ماضی میں انہوں نے مختلف ڈراموں میں کام کیا جس کا ایک دلچسپ واقعہ بتایا کہ ماضی میں، میں نے ایک ڈرامے میں بے بس بیوی کا کردار ادا کیا تھا، جس میں میرا شوہر مجھ پر بدترین تشدد کرتا تھا اور اس کردار کو کافی پذیرائی ملی۔
انہوں نے کہا کہ اسی وقت کراچی میں ایک ٹریفک سگنل پر بھیک مانگنے والی ایک خاتون آئیں اور انہوں نے مجھ سے بھیک مانگی لیکن جب فقیرنی کی نظر مجھ پر پڑی تو انہوں نے بھیک ہی نہیں مانگی۔
اداکارہ نے بتایا کہ بھیک مانگنے والی خاتون نے مجھے دیکھ کر کہا کہ ارے یہ تو سارہ ہے، اسے کیا مانگنا، اس سے مانگنا نہیں بلکہ اسے دینا چاہیے۔
شو کے دوران ایک سوال کے جواب میں اداکارہ نے انکشاف کیا کہ ماضی میں مجھے بالی ووڈ میں کام کرنے کی پیش کش ہوچکی ہے لیکن میں نے وہاں کام کرنے سے انکار کردیا تھا۔
انہوں نے کہا کہ ماضی میں شارجہ میں کرکٹ کپ ہوا تو مجھے بھی مدعو کیا گیا تھا، اسی ایونٹ میں راج کپور بھی آئے تھے، جہاں میری ان سے ملاقات ہوئی۔
لیلیٰ زبیری نے بتایا کہ کرکٹ میچ کے دوران میری اور راج کپور کی ملاقات کی تصاویر کھینچی گئیں تو راج کپور نے ان تصاویر پر مجھے اپنے دستخط کرنے کا کہا اور وہ دستخط شدہ تصاویر اپنے ساتھ لے گئے۔
اداکارہ نے کہا کہ گفتگو کے دروان راج کپور نے مجھے بتایا کہ وہ اپنی اکیڈمی میں میرے ڈرامے دکھاتے ہیں اور شاگردوں کو میری اداکاری سے متعلق بتاتے اور پڑھاتے ہیں یہ سن کر مجھے بہت خوشی اور فخر محسوس ہوا۔
لیلیٰ زبیری کے مطابق اسی دوران راج کپور نے مجھے اپنے ساتھ فلم میں کام کی پیش کش کرتے ہوئے کہا کہ میری خواہش ہے کہ ہم دونوں ایک ساتھ فلم میں کام کریں لیکن میں نے انکار کردیا۔
اداکارہ کا کہنا تھا کہ راج کپور کے ساتھ فلم میں کام کرنے سے انکار کی کوئی خاص وجہ نہیں تھی، بس میں نے ہمیشہ اپنے ملک میں ہی کام کرنے کو ترجیح دی۔
