کراچی: عدالت نے لکشمی اور لو کمار کی پسند کی شادی کے سلسلے میں پولیس کو عدم گرفتاری کا حکم جاری کر دیا ہے۔
تفصیلات کے مطابق سندھ ہائی کورٹ میں ایک نوبیاہتا جوڑے نے تحفظ کے لیے ایک درخواست دائر کی ہے، جس میں انھوں نے کہا ہے کہ دونوں نے پسند کی شادی کی ہے لیکن والدین سے انھیں خطرہ لاحق ہے۔
کیس کی سماعت کے بعد عدالت نے ایڈووکیٹ جنرل اور پراسیکیوٹر جنرل کو نوٹس جاری کرتے ہوئے پولیس کو نوبیاہتا جوڑے کو گرفتار نہ کرنے کا حکم دے دیا ہے۔
عدالت نے آئندہ سماعت پر فریقین سے جواب طلب کر لیا، اور درخواست پر سماعت 13 مارچ تک ملتوی کر دی۔
وکیل درخواست گزار نے عدالت کو بتایا کہ لکشمی اور لو کمار نے پسند کی شادی کی ہے، لیکن لڑکی کے خاندان والے دھمکیاں دے رہے ہیں، لڑکی کے خاندان والوں نے اغوا کا مقدمہ بھی درج کرایا۔
لڑکی نے اپنے بیان میں کہا کہ اس نے پسند کی شادی کی ہے، اور کسی نے اسے اغوا نہیں کیا، درخواست میں لڑکی نے عدالت سے استدعا کی کہ اسے اور اس کے شوہر کو تحفظ فراہم کیا جائے، کیوں کہ اس کے والدین اس شادی کے خلاف ہیں اور ان سے انھیں جان کا خطرہ لاحق ہے۔
