کراچی / لاہور : ملک کے مختلف شہروں میں سردی کا زور بڑھتے ہی لوگوں نے گرم ملبوسات کی خریداری کے لیے لنڈا بازاروں کا رخ کرلیا۔
اس بار لنڈا بازار میں ہونے والی مہنگائی نے خریداروں کی ہمت توڑ دی ہے، ان کا کہنا ہے کہ لنڈے میں سستی اشیاء کی تلاش میں آئے لیکن قیمتیں سن کر سردی میں بھی پسینے چھوٹ گئے ہیں۔
لاہور :
پنجاب کے شہر لاہور میں پہلی بارش کے بعد لنڈا بازار میں گرم ملبوسات کی خریداری جاری ہے تاہم کم آمدنی والے شہری سستے کپڑوں اور جوتوں کی تلاش میں سرگرداں دکھائی دیے لیکن انہیں کافی حد تک مایوسی کا سامنا کرنا پڑا۔
کراچی :
شہر قائد میں لگنے والے مختلف بچت بازاروں میں بھی لنڈے کے کپڑے فروخت کیے جاتے ہیں، اس کے علاوہ سویٹر، جرسی، جیکٹ اور جرابوں کی مانگ میں اضافے سے شہر کے اہم گلی محلے اور سڑکیں لنڈے بازاروں میں تبدیل ہوگئیں۔
صورتحال کی نزاکت کو دیکھتے ہوئے دکانداروں نے بھی قیمتوں میں من مانا اضافہ کردیا, لنڈا بازار جانے والوں کے ہوش اس وقت اڑے، جب انہیں معلوم ہوا کہ اب لنڈے کے مال کی قیمت بھی ان کی دسترس سے باہر ہوچکی ہے۔
نمائندہ اے آر وائی نیوز کراچی روحہ فاطمہ کی رپورٹ کے مطابق خریداروں کا کہنا ہے کہ گزشتہ سال کی نسبت رواں سال ان بازاروں میں غریب اور متوسط طبقے کو مایوسی کا سامنا کرنا پڑرہا ہے، استعمال شدہ پرانے گرم ملبوسات کی قیمتیں دگنی ہوگئی ہیں۔
دوسری جانب دکاندار بھی مال مہنگا ملنے کا شکوہ کرتے دکھائی دے رہے ہیں، ان کا کہنا ہے کہ مال پیچھے سے ہی مہنگا مل رہا ہے سستا کیسے فروخت کرسکتے ہیں۔
