پشاور میں فاٹا ڈس ایبل ویلفیئر آرگنائزیشن کے زیراہتمام بارودی سرنگوں کے متاثرین کے اعزاز میں ایک تقریب منعقد کی گئی، جس میں متاثرین کو بایونک آرمز اور لیگز فراہم کیے گئے۔
تفصیلات کے مطابق پشاور میں فاٹا ڈس ایبل ویلفیئر آرگنائزیشن کے زیر اہتمام بارودی سرنگوں سے متاثرین کے اعزاز میں تقریب منعقد ہوئی، فاٹا سے تعلق رکھنے والے 50 سے زیادہ متاثرہ افراد جس میں 10 خواتین بھی شامل تھیں، نے شرکت کی۔
کور کمانڈر پشاور لیفٹیننٹ جنرل حسن اظہر حیات تقریب کے مہمان خصوصی تھے، فاٹا ڈس ایبل ویلفیئر آرگنائزیشن نے پاک فوج کے تعاون سے اب تک ایک ہزار 43 متاثرین کی نہ صرف بحالی میں مدد کی بلکہ ان کی فلاح وبہبود کے لیے بھی ٹھوس اقدامات کیے۔
چیئرمین فاٹا ڈس ایبل ویلفیئر آرگنائزیشن عرفان اللہ جان نے پاک فوج کی جانب سے متاثرین کی بحالی کے لیے کی جانے والی کاوشوں کو سراہا، پاک فوج فاٹا ڈس ایبل ویلفیئر آرگنائزیشن کے ساتھ مل کر متاثرین کے لیے بایونک ارمز اور لیگز کی فراہمی کے لیے متعدد کاوشوں پر مالی امداد اور رہنمائی فراہم کر رہی ہے۔
مہمان خصوصی نے متاثرین میں مالی امداد کی مد میں کیش اور لیپ ٹاپس تقسیم کیے، تقریب میں متاثرین کے لواحقین، چیف سیکریٹری خیبر پختون خوا سمیت بڑی تعداد میں عسکری اور سول حکام نے شرکت کی، چیئرمین فاٹا ڈس ایبل ویلفیئر آرگنائزیشن عرفان اللہ جان نے کہا کہ میں مشکور ہوں کہ جب بھی ہمیں ضرورت پڑی تو پاک فوج نے ہمارا ساتھ دیا، سیکریٹری سپشل ایجوکیشن خیبر پختون خوا ڈاکٹر انیلا درانی نے کہا آج کی تقریب کا انعقاد اس بات کا ثبوت ہے کہ حکومت خیبر پختون خوا اور پاک فوج قبائلی اضلاع میں دہشت گردی اور بارودی سرنگوں سے متاثرین کے فلاح و بہبود کے لیے کوشاں ہے۔
لیگل ایڈوائزر فاٹا ڈس ایبل ویلفیئر آرگنائزیشن نتاشا سمن نے کہا کہ فاٹا ڈس ایبل ویلفیئر آرگنائزیشن کے ساتھ پاک فوج کی امداد نہ صرف متاثرہ فرد بلکہ ان کے لواحقین تک بھی اس کا فائدہ پہنچتا ہے، جنوبی وزیرستان کے متاثرہ شخص ناظم اللہ نے کہا کہ میں پاک فوج اور فاٹا ڈس ایبل ویلفئیر آرگنائزیشن کا شکر گزار ہوں کہ انھوں نے ہمارے ساتھ تعاون کیا۔
