فیصل آباد : لیپ ٹاپ پھٹنے سے گھر میں آتشزدگی کے باعث جھلسنے والی خاتون اور تین سالہ بچہ بھی دم توڑ گیا۔
تفصیلات کے مطابق فیصل آباد کےعلاقے شریف پورہ کے ایک گھر میں لیپ ٹاپ پھٹنے سے آتشزدگی کے باعث جھلسنے والے مزید دو افراد دم توڑ گئے۔
محمد احمد کی بیوی بتیس سالہ نرگس اور تین سالہ بیٹا ابراہیم بھی آج علی الصبح انتقال کر گئے، ابراہیم کا جسم ستر فیصد اور بتیس سالہ نرگس کا جسم 72 فیصد جھلس چکا تھا، جس کے بعد جاں بحق ہونے والے افراد کی تعداد چار ہوگئی۔
منگل کی رات رہائشی محمداحمد کے گھر میں اسپارکنگ کی وجہ سے لیپ ٹاپ پھٹنے سے لگنے والی آگ مبینہ طور پر اے سی کی گیس لیکج کے باعث کمرے میں پھیل گئی تھی۔
جس کے نتیجے میں وہاں سوئے چار بچوں سمیت نو افراد جھلس کر زخمی ہوگئے تھے، متاثرین کوالائیڈ اسپتال کے برن وارڈ منتقل کیا گیا تھا۔
جہاں چھ سال کی بیٹی دعا فاطمہ اورنو سال کا بیٹا طہٰ جاں بحق ہوگئے تھے جبکہ جھلسنے والے پانچ افراد زیرعلاج ہیں، جن میں سے دو خواتین کی حالت تشویشناک بتائی جاتی ہے، ان کے جسم ساٹھ فیصد جھلس چکےہیں۔
جاں بحق ہونے والی ماں اوراس کے تینوں بچوں کی نمازجنازہ گھر کے قریب پارک میں ادا کی گئی اورمقامی قبرستان میں سپردِ خاک کردیا گیا ہے۔
