کراچی : بلال کالونی میں ڈکیتی مزاحمت پر نوجوان عبدالرحمن کو قتل کرنیوالا ملزم پولیس مقابلے میں ہلاک ہوگیا۔
تفصیلات کے مطابق کراچی کے علاقے بلال کالونی میں ڈکیتی مزاحمت پر نوجوان کو قتل کرنیوالا ملزم مارا گیا، ڈی آئی جی ویسٹ عرفان علی بلوچ نے بتایا کہ بلاول کالونی میں آج مقابلے میں ایک ملزم ہلاک اور دوسرا گرفتار ہے، ہلاک ملزم بلال کالونی میں نوجوان عبدالرحمن کے قتل میں ملوث تھا۔
ڈی آئی جی ویسٹ کا کہنا تھا کہ 24 مارچ کو ملزمان نے فوم کی دکان پر لوٹ مار کی تھی ، جس پر نوجوان عبدالرحمن نے ملزمان پکڑنےکی کوشش کی تھی تو مزاحمت پر ملزمان نے فائرنگ کی ، جس سے عبدالرحمان جاں بحق ہوا۔
عرفان علی بلوچ نے کہا کہ ہلاک ملزم افضل حسین کیخلاف درجن سے زائد مقدمات درج تھے، بلال کالونی، منگھوپیر، اجمیر نگری ، تھانہ پاکستان بازار ،حیدری ،اورنگی ٹاؤن ،جمشید کوارٹر اور اے سی ایل سی میں بھی مقدمات تھے۔
ڈی آئی جی ویسٹ کے مطابق زخمی حالت میں گرفتار ساتھی نے بھی بیان میں اعتراف کیا ہے۔
