دنیا بھر میں مقبول ہالی ووڈ فلم سیریز جیمز بانڈ کی 25 ویں فلم نو ٹائم ٹو ڈائی کی اداکارہ لشانا لنچ نے کہا ہے کہ جب میڈیا میں خبر آئی کہ اگلی جاسوس وہ بنیں گی، تب لوگوں نے سوشل میڈیا پر ان کی تضحیک کی۔
لشانا لنچ سے متعلق جولائی 2019 میں یہ خبر سامنے آئی تھی کہ اب وہ جیمز بانڈ کی 26 ویں فلم میں جاسوس 007 کا کردار ادا کریں گی اور وہ ایسا کرنے والی پہلی خاتون ہوں گی۔
حال ہی میں اداکارہ نے مذکورہ معاملے پر انٹرویو میں انکشاف کیا کہ مذکورہ خبر سامنے آنے کے بعد لوگوں نے سوشل میڈیا پر انہیں تنقید کا نشانہ بنایا اور ان کے لیے نامناسب الفاظ استعمال کیے گئے۔
لشانا کے مطابق جب انہیں اگلی جیمز بانڈ فلم میں جاسوس بنائے جانے کی خبر آئی تو لوگ غصہ ہوگئے، انہوں نے ان پر تنقید کرنا شروع کردی، لوگوں نے کہا کہ لشانا لنچ تو ایک خاتون ہیں، وہ کیسے جیمز بانڈ کی جاسوس بن سکتی ہیں اور یہ کہ وہ تو سیاہ فام بھی ہیں۔
لشانا لنچ کا کہنا تھا کہ انہیں شدید صنفی اور نسلی تنقید کا نشانہ بنایا گیا، جس کے بعد انہوں نے ان دنوں میں موبائل فون کا استعمال کم کردیا۔
انہوں نے بتایا کہ فلم کے پروڈیوسرز نے کاسٹ کرتے وقت یہ نہیں بتایا تھا کہ انہیں شہرہ آفاق فلم سیریز میں کام کرنا پڑے گا، انہیں بتایا گیا کہ وہ کسی اچھی ویب سیریز کے لیے عمدہ کردار کے لیے کاسٹ کی گئی ہیں۔
لشانا لنچ کے مطابق ان سے یہ بات کافی وقت تک خفیہ رکھی گئی کہ وہ جیمز بانڈ میں جاسوس کی ساتھی کا کردار ادا کریں گی، تاہم انہیں کردار کے لیے سخت ٹریننگ کروائی، جس دوران انہیں شبہ ہوا کہ ان سے کوئی منفرد کام کروایا جائے گا۔
سیاہ فام برطانوی اداکارہ کے مطابق کئی ماہ تک تربیت لینے کے بعد انہیں مکمل طور پر معلوم ہوا کہ وہ جیمز بانڈ فلم میں جاسوس کی ساتھی کے کردار کے لیے کاسٹ کی گئیں، جس کے بعد ان کی خوشی دیدنی تھی۔
