پنجاب کی سینئر صوبائی وزیرمریم اورنگزیب نے کہا ہے کہ لاسٹ کال ’’لاسٹ فال‘‘ میں تبدیل ہوگئی، پنجاب اور لاہورکے عوام کا شکریہ۔
مریم اورنگزیب کا کہنا تھا کہ فرنچائز پی ٹی آئی کا آج دیوالیہ ہوگیا، عوام نے مسترد کردیا، کہا تھا گھر کا معاملہ گھر میں ہی طے کرلیں، پنجاب کی عوام پاکستان اور صوبے کی ترقی کے ساتھ ہیں، الجہاد فساد اور فتنہ کی نذر ہوگیا۔
سینئر صوبائی وزیر کا کہنا تھا کہ بشریٰ بی بی، علیمہ باجی دونوں غائب ہیں، جلد علی امین کے غائب ہونے کی خبرآئیگی، بشریٰ بی بی اورعلیمہ دونوں نے بانی پی ٹی آئی کو بھی فارغ کردیا۔
انھوں نے کہا کہ فتنہ جیل میں بند ہے پہلے ملک لوٹنے پر لگا ہوا تھا اب فساد پھیلانے پر لگا ہوا ہے، ہمیشہ ملک بند کرنے کی بات کی اور ہمیشہ ملک بند کیا۔
آدھا انقلاب انقلاب سے پہلے گرفتار اور آدھا انقلاب سے پہلے بھاگ گیا، نہ انقلاب آیا نہ بانی چھُوٹا لیکن ایک بات ثابت ہوگئی عوام نے فتنہ، فساد کو چھوڑ دیا۔
سینئر صوبائی وزیر مریم اورنگزیب نے کہا کہ ایک بار پھر حکومت کے صحت، ریلیف پر خرچ ہونے والے وسائل ریاست مخالف دہشتگردی کی نظر ہوگئے، شکر ہے آج کے بعد انقلاب کا تماشہ تو بند ہوگا لیکن ہیں بڑے بےشرم اِن کا کوئی پتہ نہیں۔
