کراچی : نوجوان تشدد کیس میں پیشی کے موقع پر ایک وکیل نے ملزم سلمان فاروقی کو منہ پرتھپڑ رسید کردیا۔
تفصیلات کے مطابق سٹی کورٹ میں ڈیفنس اتحاد کمرشل میں نوجوان شہری کو تشدد کا نشانہ بنانے کے معاملے کی سماعت ہوئی۔
عدالت میں وکلا کی جانب سے ملزم کو دھکے دیئے گئے، جس پر ملزم کو پولیس کی نگرانی میں عدالت سے باہر منتقل کیا، اس موقع پر ایک وکیل نے ملزم سلمان فاروقی کے منہ پر تھپڑ مار دیا۔
اس سے قبل گذری پولیس نے دونوں ملزمان کو دوبارہ عدالت میں پیش کیا جبکہ ملزم سلمان فاروقی کے وکیل نعیم قریشی بھی عدالت میں پیش ہوئے۔
ملزم سلمان فاروقی کی جانب سے درخواست ضمانت دائر کردی گئی، درخواست ملزم کے وکیل نعیم قریشی نے دائر کی۔
وکیل ملزم نے عدالت کو بتایا کہ ملزم کے خلاف دھمکیاں دینے کا مقدمہ جو کہ قابل ضمانت ہے، جس پر تفتیشی افسر نے استدعا کی کہ ملزمان کا جسمانی ریمانڈ دیا جائے۔
وکیل ملزم نے کہا کہ ملزم کو ایک دن کیلئے جسمانی ریمانڈ دے دیں، جس پر عدالت نے دو روز کے جسمانی ریمانڈ پر ملزمان کو پولیس کے حوالے کرتے ہوئے آئندہ سماعت پر مقدمہ کی پیش رفت رپورٹ بھی پیش کرنے کا حکم دے دیا۔
