اسلام آباد: الیکشن کمیشن نے کراچی کے 7 اضلاع میں بلدیاتی انتخابات ملتوی کر دیے۔
تفصیلات کے مطابق الیکشن کمیشن کے اہم اجلاس میں ایک بار پھر کراچی کے بلدیاتی انتخابات ملتوی کرنے کا فیصلہ کر لیا گیا ہے۔
ذرائع کا کہنا ہے کہ الیکشن کمیشن نے 15 دن کے بعد اجلاس دوبارہ طلب کر لیا ہے، جس میں بلدیاتی الیکشن کی نئی تاریخ کا اعلان کیا جائے گا۔
وفاقی حکومت کے خط کے بعد سندھ کے بلدیاتی انتخابات کا دوسرا مرحلہ ملتوی کیا گیا، بلدیاتی انتخابات ملتوی کرنے کا فیصلہ چیف الیکشن کمشنر کی زیر صدارت اجلاس میں ہوا۔
اجلاس میں وفاقی حکومت کے خط کا جائزہ لیا گیا، جس میں وفاقی حکومت نے کراچی کے بلدیاتی الیکشن کے لیےسیکیورٹی اہل کار دینے سے معذرت کی تھی، جب کہ سندھ حکومت نے 16 ہزار سیکیورٹی اہل کاروں کا مطالبہ کیا تھا۔
حکومت کی کراچی کے بلدیاتی الیکشن کیلئے سیکیورٹی اہلکار دینے سے معذرت
خیال رہے کہ سندھ حکومت نے الیکشن کمیشن سے 90 دن کے لیے انتخابات ملتوی کی درخواست کی ہے، سندھ حکومت کراچی بلدیاتی انتخابات ملتوی کرانے کے لیے 3 بار درخواست کر چکی ہے۔
الیکشن کمیشن نے اپنے بیان میں کہا ہے کہ کراچی کے تمام پولنگ اسٹیشن حساس ہیں، اس لیے فیصلہ عوام کی فلاح کے لیے کیا، بیان میں کہا گیا کہ تمام پولنگ اسٹیشنز پر سیکیورٹی فورسز تعینات کرنے کی ضرورت ہے، ہم نے سیکیورٹی فورسز کے اہل کار مانگے، اور دینے سے انکار کیا گیا۔
