لاہور کی سیشن عدالت نے نازیبا ویڈیو بنانے کے کیس میں اداکارہ خوشبو سمیت 6 ملزمان کو طلب کرلیا۔
اے آر وائی نیوز کے مطابق سیشن عدالت نے تھیٹر میں اسٹیج اداکاراؤں کی نازیبا ویڈیو بنانے کے کیس میں اداکارہ خوشبو سمیت 6 ملزمان کی عبوری ضمانتوں میں توسیع کرتے ہوئے ملزمان کو تفتیش میں شامل ہونے کا حکم دے دیا۔
ایڈیشنل سیشن جج محمد یاسین شاہین نے ملزمان کی درخواست ضمانت پر سماعت کی، متاثرہ اداکارہ گلناز عرف سلک خان عدالت پیش ہوئیں، ادکارہ گلناز نے عدالت میں بیان دیا کہ ملزمہ خوشبو، حیدر علی، اور بہادر علی کا مقدمہ میں کوئی کردار نہیں ہے۔
گلناز عرف سلک خان نے عدالت میں موقف اختیار کیا کہ ملزمان نے قابل اعتراض تصاویر اور ویڈیو وائرل نہیں کیں،عدالت ان کی ضمانتیں منظور کرے تو اعتراض نہیں ہو گا۔
ایف آئی اے کے اسٹنٹ ڈائریکٹر نے کیس کا ریکارڈ عدالت پیش کرتے ہوئے بتایا کہ ملزمان شامل تفتیش نہیں ہوئے ملزمان کی ضمانتیں خارج کی جائیں،عدالت نے ملزمان کو شامل تفتیش ہونے کا حکم دیتے ہوئے عبوری ضمانت میں 24 جنوری تک توسیع کردی۔
واضح رہے کہ گزشتہ ماہ لاہور کے نجی تھیٹر میں ڈانسر کی کپڑے بدلنے کی ویڈیو لیک کے معاملے پر ایف آئی اے سائبر کرائم ونگ نے اداکارہ خوشبو خان سمیت دیگر کے خلاف مقدمہ درج کیا تھا۔
