اسرائیل کی جنوبی لبنان میں دراندازی کے بعد اس کے کتنے فوجی مار گئے، اسرائیلی حکام نے اس حوالے سے تفصیلات بتادیں۔
غیرملکی میڈیا رپوٹس کے مطابق اسرائیلی فوج نے اعتراف کیا ہے کہ جنوبی لبنان میں اسرائیلی فوج کے مزید 7 اہلکار مارے گئے ہیں، جنوبی لبنان میں مارے گئے اسرائیلی فوجیوں کی تعداد 8 ہوگئی ہے۔
اسرائیلی فوج کی جانب سے یہ بھی اعتراف کیا گیا کہ ایرانی میزائل اسرائیل کے فضائی اڈوں پر گرے ہیں، ایران سے داغے گئے متعدد میزائل اسرائیلی فضائی اڈوں کےاندر گرے۔
اسرائیل ایران کشیدگی کے بعد برطانوی وزارت دفاع نے اپنے بیان میں کہا کہ برطانیہ کے لڑاکا طیاروں نے کل رات کشیدگی روکنے کیلئے کردار ادا کیا، 2 برطانوی لڑاکا طیاروں اور ایک وائجر نے کشیدگی روکنے میں اپنا حصہ ڈالا۔
برطانوی سفیر نے اقوام متحدہ کے سلامتی کونسل اجلاس میں موقف اختیار کرتے ہوئے کہا ہے کہ ایران جنگ میں نہ کودے، مشرق وسطیٰ میں کشیدگی بڑھنے پر تشویش ہے۔
اقوام متحدہ میں برطانوی سفیر نے کہا کہ برطانیہ اسرائیل کے اپنے دفاع کےحق کی حمایت کرتا ہے، ایران اور خطے کے دیگر ممالک کو تحمل کا مظاہرہ کرنا چاہیے، ہماری کوششیں تشدد کی لہر کو کم کرنے پر مرکوز ہونی چاہئیں۔
