ایک طرف پاکستان کے غریب عوام سارا سارا دن بجلی سے محروم اور مہنگائی سے مر رہے ہیں ہیں تو دوسری جانب سرکاری افسران بجلی کا استعمال ’مالِ مفت دل رحم‘ کی طرح کرتے ہیں۔
اس کی ایک تازہ مثال واپڈا کے ایک دفتر میں نظر آئی، لاہور کو بجلی فراہم کرنے والے ادارے لاہور الیکٹرک سپلائی کارپوریشن ’لیسکو‘ کے افسران کے خالی دفاتر میں بھی ایئر کنڈیشن (اے سی) بدستور چلتے رہتے ہیں۔
ایسے وقت میں جب شہر میں بجلی کا شدید بحران ہے ان دفاتر میں درجنوں ایئر کنڈیشن (اے سی) سارا دن چلتے رہتے ہیں، اے آر وائی نیوز کے پروگرام سرعام کی ٹیم نے لیسکو کے دفتر کا دورہ کیا تو مضحکہ خیز صورتحال دیکھنے میں آئی۔
لیسکو کے اسی دفتر میں جہاں افسران کے خالی دفاتر میں ایئر کنڈیشن (اے سی) چلائے جارہے ہیں تو وہی بجلی کی بچت مہم کے حوالے سے لکھا ایک بینر بھی دیکھا جو بے بس عوام کو منہ چڑا رہا تھا۔
ٹیم سر عام نے تین دن تک ان خالی دفاتر میں ایئر کنڈیشن (اے سی) چلانے کی ریکارڈنگ کی، افسر چاہے دفتر آئے یا نہ آئے ان کے شاہانہ دفاتر کے اے سی صبح نو بجے سے شام تک 16 ٹمپریچر پر چلا دیے جاتے ہیں۔
اس موقع پر اپنے کام کے سلسلے میں آئے ہوئے واپڈا کے ایک ریٹائرڈ ملازم نے اس بے قاعدگی پر پردہ ڈالنے کی کوشش کی اور ٹیم سرعام پر ہی الزام عائد کرتے ہوئے کہا کہ آپ نے مجھ سے توہین آمیز لہجے میں بات کی لیکن جب انہیں ثبوتوں کے ساتھ ویڈیوز دکھائی گئیں تو انہوں نے چپ رہنے میں ہی عافیت جانی۔
ٹیم سرعام کو دیکھ کر عمارت کے نچلے حصے میں موجود وہ دفاتر کے ایئر کنڈیشن (اے سی) بھی بند کردیئے گئے جس میں ملازمین بیٹھے کام کررہے تھے۔
لیسکو کے ڈی جی ایڈمن نے ’ٹیم سرعام‘ کی ساری روداد سننے کے بعد کہا کہ اس مسئلے کے حل کیلیے قواعد مرتب کیے جائیں گے اور اس پر سختی سے عمل درآمد کروایا جائے گا۔
