لاہور: اووربلنگ پر لیسکو حکام نے ایف آئی اے طلبی مسترد کر دی ہے، طلب کیے گئے ایس ایز ایف آئی اے میں پیش نہیں ہوئے۔
ذرائع کا کہنا ہے کہ ایف آئی اے اور لیسکو حکام میں تنازع چل رہا ہے، ایف آئی اے نے آج انکوائری کے لیے 7 ایس ایز کو بلایا تھا تاہم ایک بھی ایس ای ایف آئی اے میں پیش نہیں ہوا۔
ذرائع کے مطابق لیسکو افسران کا کہنا ہے کہ وہ عید کے بعد وکلا کے ذریعے جواب دیں گے، صرف نیپرا اووربلنگ کی جانچ پڑتال کر سکتا ہے، ایف آئی اے اووربلنگ معاملے کو نہیں دیکھ سکتا۔
لیسکو حکام کا کہنا ہے کہ 2 روز قبل ایک ایکسین کو بلاوجہ گرفتار کیا گیا جس پر انھیں تحفظات ہیں۔ واضح رہے کہ وفاقی وزیر داخلہ محسن نقوی کی ہدایت پر بجلی کی تقسیم کار کمپنیوں میں اووربلنگ کے خلاف آپریشن تیز کر دیا گیا ہے۔
ایف آئی نے لیسکو ڈویژن شاہ پور کے ایکسین راؤ کامران کو اربوں روپے کی اووربلنگ کرنے پر گرفتار کیا، شاہ پور ڈویژن میں 4 کروڑ 90 لاکھ یونٹس کی اووربلنگ کی نشان دہی کی گئی تھی جس پر ایف آئی نے تحقیقات کے بعد ایکسین راؤ کامران کو گرفتار کیا۔
