The news is by your side.

Advertisement

عدالت کا اسپیکر قومی اسمبلی کو حمزہ شہباز سے حلف لینے کا حکم

لاہور ہائی کورٹ نے قومی اسمبلی کے اسپیکر راجہ پرویز اشرف کو پنجاب کے وزیر اعلیٰ حمزہ شہباز سے عہدے کا حلف لینے کا حکم دے دیا ہے۔

اے آر وائی نیوز کے مطابق لاہور ہائی کورٹ نے حمزہ شہباز کی درخواست منظور کرلی۔ عدالت نے نومنتخب وزیر اعلیٰ پنجاب کے معاملے پر فیصلہ سنا دیا ہے۔

عدالت نے حکم جاری کیا ہے کہ اسپیکر قومی اسمبلی کل ساڑھے 11 بجے حمزہ شہباز سے حلف لیں۔

پنجاب کے نومنتخب وزیر اعلیٰ حمزہ شہباز نے اسپیکر پنجاب اسمبلی پرویز الٰہی کے حلف نہ لینے کے خلاف تیسری بار لاہور ہائی کورٹ سے رجوع کیا تھا جس میں استدعا کی گئی تھی کہ عدالت حمزہ شہباز سے حلف لینے کے لیے نمائندہ مقرر کرے۔

حمزہ شہباز نے لاہور ہائی کورٹ میں آئینی درخواست دائر کی تھی۔ درخواست میں وفاق و پنجاب حکومت کو فریق بنایا گیا تھا۔

درخواست میں کہا گیا تھا کہ عدالت حلف سے متعلق احکامات جاری کر چکی ہے، عدالتی احکامات پر عمل درآمد نہیں کیا جا رہا، گورنر پنجاب عمر سرفراز چیمہ ایک بار پھر عدالتی حکم ماننے سے انکار کر رہے ہیں۔

درخواست گزار نے استدعا کی تھی کہ عدالت حمزہ شہباز سے حلف لینے کے لیے نمائندہ مقرر کرنے کے ساتھ ساتھ حلف لینے کے لیے وقت اور جگہ کا بھی تعین کرے اور حلف نہ لینے والوں کے اقدامات خلاف آئین قرار دیے جائیں۔

یا رہے کہ لاہور ہائی کورٹ نے فیصلہ سناتے ہوئے گورنر پنجاب کو حکم دیا تھا کہ نئے وزیر اعلیٰ پنجاب حمزہ شہباز سے خود یا اپنے کسی نمائندے کے ذریعے حلف لیں۔

فیصلے میں کہا گیا تھا کہ آئین فوری طور پر وفاقی یا صوبائی حکومت بنانے کی تجویز دیتا ہے، موجودہ صورتِ حال کے مطابق صدر یا گورنر فوری حلف لینے کے آئینی طور پر پابند ہیں۔

Comments

یہ بھی پڑھیں