لاہور : لاہور ہائیکورٹ نے اینٹی بیگری ایکٹ پر مکمل عمل درآمد کا حکم دیتے ہوئے کہا کہ بھکاری مافیا کیخلاف موثر کارروائی کیلئے موبائل ایپ بنائی جائے۔
تفصیلات کے مطابق لاہور ہائی کورٹ میں اینٹی بیگری ایکٹ پرعمل درآمد کی درخواست پرسماعت ہوئی۔
جسٹس ساجد محمودسیٹھی نے نفیر اے ملک کی درخواست پر سماعت کی۔
درخواست میں موقف اختیار کیا گیا کہ صوبے میں بھکاری مافیا کے خاتمے کیلئے قانون بنایا گیا، عدالت نے حکومت کو صوبے بھر سے بھکاری مافیاختم کرنےکاحکم دیا۔
عدنان احسان ایڈووکیٹ نے بتایا کہ سرکاری محکمے عدالتی حکم پر عمل درآمد نہیں کررہے، بیرون ملک بھی بھکاری مافیابدنامی کا باعث بن رہاہے، استدعا ہے کہ عدالت پنجاب حکومت کو بھکاری مافیا کیخلاف مؤثر کارروائی کا حکم دے۔
مزید پڑھیں : بیرونی ممالک سے کتنے پاکستانی بھکاری ملک بدر کئے گئے؟ تفصیلات سامنے آگئیں
لاہور ہائیکورٹ نے اینٹی بیگری ایکٹ پر مکمل عمل درآمد کا حکم دیتے ہوئے کہا کہ 3ماہ میں عدالتی حکم پرعمل درآمد کرکےرپورٹ پیش کی جائے۔
عدالت نے ہدایت کی بھکاری مافیا کیخلاف موثر کارروائی کیلئے موبائل ایپ بنائی جائے اور چھوٹے بچوں سے بھیک منگوانے والوں کیخلاف مقدمات درج کیے جائیں ساتھ ہی بھکاریوں کیلئے بنائے گئے فلاحی سینٹر فعال کئے جائیں۔
عدالت نے محکمہ داخلہ کی رپورٹ پرعدم اطمینان کا اظہار کرتے ہوئے کہا کہ آپ عدالتی احکامات پرعمل درآمد کرکےرپورٹ لائیں۔
عدالت نے کیس کی سماعت 3ماہ کیلئے ملتوی کر کے رپورٹ طلب کرلی۔
