لاہور: چیف جسٹس لاہورہائی کورٹ نے الیکشن کمیشن کی جانب سے ٹریبونلز کے لیے ججز کے نام دینے کی استدعا مسترد کردی۔
تفصیلات کے مطابق الیکشن کمیشن کی جانب سے چیف جسٹس لاہور ہائی کورٹ کو درخواست دی گئی تھی کہ الیکشن ٹریبونلز کے تین ججوں کاظم ملک ، جاوید رشید محبوبی اور رانا زاہد محمود کی مدت ملازمت 31 اگست کو ختم ہورہی ہے اور الیکشن کمیشن ان تینوں ٹریبونلز کی مدت میں مزید توسیع نہیں چاہتا۔
درخواست میں یہ بھی کہا گیا کہ جو مقدمات ان ٹریبونلز کے پاس زیرالتواء ہیں ان کی سماعت کے لئے لاہورہائی کورٹ کے ججز پر مشتمل ٹریبونلز تشکیل دیے جائیں۔
چیف جسٹس لاہورہائی کورٹ نے درخواست مسترد کرتے ہوئے قراردیا کہ قانون کے مطابق صرف ریٹائرڈ سیشن ججز ہی الیکشن ٹریبونلز میں تعینات کیے جاسکتے ہیں اس لیے الیکشن کمیشن کی درخواست مسترد کی جاتی ہے۔
