لاہور : لاہور ہائیکورٹ نے بانی پاکستان قائداعظم محمد علی جناح کی بمبئی میں ملکیتی جائیداد کی حفاظت کو یقینی بنانے کے لئے دائر درخواست نہ قابل سماعت قرار دیتے ہوئے خارج کر دی۔

تفصیلات کے مطابق لاہور ہائیکورٹ کی جسٹس عائشہ اے ملک نے کیس کی سماعت کی، درخواست گزار رانا علم الدین غازی ایڈووکیٹ نے موقف اختیار کیا کہ ممبئی انڈیا میں قائداعظم کی جائیدادیں جن میں کوٹھی، بنگلے شامل ہیں پر بھارتیوں نے قبضہ جما رکھا ہے۔

انہوں نے بتایا کہ بانی پاکستان کی نجی جائیداد کو اس کی اصل شکل میں برقرار رکھنے اور ناجائز قابضین سے واگزار کرانے کے لئے بھارتی حکومت نے کوئی اقدامات نہیں کئے جبکہ حکومت پاکستان بھی خاموش تماشائی کا کردار ادا کر رہی ہے۔

انہوں نے استدعا کی کہ عدالت حکومت پاکستان کو قائد اعظم کی نجی پراپرٹی کے تحفظ کا حکم جاری کرے۔

جس پر عدالت نےریمارکس دیئے کہ اس طرح کے معاملات حکومت کی پالیسیوں کا حصہ ہوتے ہیں . درخواست گزار کو اس معاملے پر پہلے حکومت پاکستان کے فورم سے رجوع کرنا چایئے تھا۔

عدالت نے دائر درخواست نا قابل سماعت قرار دیتے ہوئے مسترد کر دی۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔