نواز شریف، مریم نواز اور کیپٹن (ر) صفدر کی سزا کالعدم قرار دینے کی درخواستیں مسترد -
The news is by your side.

Advertisement

نواز شریف، مریم نواز اور کیپٹن (ر) صفدر کی سزا کالعدم قرار دینے کی درخواستیں مسترد

لاہور: سابق وزیر اعظم نواز شریف، ان کی صاحبزادی مریم نواز اور داماد کیپٹن (ر) صفدر کی سزا کالعدم قرار دینے کی درخواستیں مسترد کردی گئیں۔

تفصیلات کے مطابق ایون فیلڈ ریفرنس میں شریف خاندان کو دی جانے والی سزا کے خلاف دائر درخواستیں لاہور ہائیکورٹ نے مسترد کردیں۔

سابق وزیر اعظم نواز شریف، ان کی صاحبزادی مریم نواز اور داماد کیپٹن (ر) صفدر نے اپنی سزائیں کالعدم قرار دینے کی درخواستیں کی تھیں۔ درخواستوں میں نیب قانون کالعدم قرار دینے کی استدعا بھی کی گئی تھی۔

لاہور ہائیکورٹ نے نیب اور درخواست گزاروں کے دلائل سننے کے بعد فیصلہ دیا۔ لاہور ہائیکورٹ کے مطابق اٹھارویں ترمیم کے بعد بھی نیب کا قانون برقرار ہے۔

خیال رہے کہ سابق وزیر اعظم نواز شریف کے خلاف پاناما میں آف شور کمپنیوں کا معاملہ سامنے آنے کے بعد سپریم کورٹ نے قومی احتساب بیورو (نیب) کو شریف خاندان کے خلاف ریفرنس دائر کرنے کا حکم دیا تھا۔

نیب کی جانب سے 3 ریفرنس دائر کیے گئے جن میں سے ایون فیلڈ ریفرنس میں نواز شریف کو 10 سال قید، مریم نواز کو 7 سال قید جبکہ کیپٹن صفدر کو 1 سال قید کی سزا بمعہ جرمانہ سنائی گئی تھی۔

شریف خاندان کے خلاف بقیہ دو ریفرنسز العزیزیہ اور فلیگ شپ ریفرنس کی سماعتیں ابھی جاری ہیں۔

Comments

comments

یہ بھی پڑھیں