لاہور : لاہور ہائی کورٹ نے پی ٹی آئی کارکن ظل شاہ کی ہلاکت پر جوڈیشل کمیشن بنانے کی درخواست پر فیصلہ محفوظ کرلیا۔
تفصیلات کے مطابق لاہور ہائی کورٹ میں پی ٹی آئی کارکن ظل شاہ کی ہلاکت پر جوڈیشل کمیشن بنانے کی درخواست پر سماعت ہوئی۔
جسٹس شمس محمود مرزا نے ایڈووکیٹ ندیم سرور کی درخواست پرسماعت کی۔
عدالت نے وکیل درخواست گزار سے استفسار کیا کیا آپ نے جوڈیشل کمیشن بنانے کیلئے متعلقہ فورم سے رجوع کیا؟ وکیل درخواست گزار نے بتایا کہ حکومت کو جوڈیشل کمیشن بنانے کیلئے درخواست نہیں دی۔
جس پر عدالت کا کہنا تھا کہ تو پھر آپ کیسے ہائیکورٹ میں رٹ دائر کرسکتے ہیں، جوڈیشل کمیشن بنانے کیلئے عدالتی دائرہ اختیارپرکوئی قانون بتائیں۔
دائر درخواست میں مؤقف اختیار کیا گیا تھا کہ علی بلال عرف ظل شاہ کو دن دیہاڑے قتل کر کے سروس اسپتال چھوڑ دیا گیا ، پوسٹ مارٹم رپورٹ میں ظل شاہ پر بدترین تشدد کے نشانات سامنے آئے ہیں۔
درخواست میں کہنا تھا کہ ظل شاہ کی ہلاکت اہم نوعیت کا معاملہ ہے جس کی تحقیقات ہونا ضروری ہیں ، لاہور ہائیکورٹ ظل شاہ کی ہلاکت کی تحقیقات کے لیے کمیشن بنانے کا حکم دے۔
عدالت نے پی ٹی آئی کارکن ظل شاہ کی ہلاکت پر جوڈیشل کمیشن بنانے کی درخواست کے قابل سماعت سے متعلق فیصلہ محفوظ کرلیا۔