کراچی: جامعہ کراچی میں لائبریری کی اہمیت کے حوالے سے تین روزہ کانفرنس کا آغاز کل سے ہورہاہے جس میں دنیا بھر سے لائبریری سائنس کے ماہرین شرکت کریں گے۔
تفصیلات کے مطابق یہ کانفرنس بین الاقوامی کتب خانوں، انٹرنیشنل فیڈریشن آف لائبریری ایسوسی ایشن اینڈ انسٹی ٹیوشنز(افلا) اور اسپیشل لائبریریز ایسوسی ایشن( ایس ایل اے) اور مقامی تنظیم گوئٹے انسٹیٹیوٹ کے اشتراک سے منعقد ہو رہی ہے۔
پاکستان لائبریری کلب کے زیرِ اہتمام جامعہ کراچی کے حسین ابراہیم جمال ریسرچ انسٹیٹیوٹ آف کیمیسٹری میں تین روزہ بین الاقوامی کانفرنس کی تقریب کا آغاز2 اگست2018ءصبح9بجے جمعرات سے ہو رہا ہے جو 4 اگست تک جاری رہے گا۔
اس کانفرنس میں مختلف ممالک سے لائبریری ماہرین شرکت کریں گے اور اپنے تحقیقی مقالے پیش کریں گے جبکہ پاکستان کے نامور لائبریری محققین ، لائبریرینز اور ماہرینِ تعلیم اور شوقینِ کتب کی بڑی تعداد اس کانفرنس میں شرکت کرے گی۔
پاکستان لائبریری کلب کے ڈائریکٹر ارشد محمود عباسی نے بتایا کہ پاکستان لائبریری کلب گزشتہ ایک دھائی سے ملک میں کتب خانوں کے فروغ کے لئے اپنا کردار نبھا رہی ہے۔ اس کانفرنس کے افتتاحی اجلاس کی صدارت ریجنل ڈائریکٹر ایچ ای سی جاوید میمن کریں گے جبکہ مختلف ممالک سے آئے ہوئے ماہرین اپنے اپنے مقالے پیش کریں گے۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں
