مختلف عمارتوں پر بڑے بڑے شیشے لگانا ان عمارات کی خوبصورتی میں اضافہ تو کرسکتا ہے، تاہم ان شیشوں کی صفائی ایک دقت طلب کام ہوتی ہے۔
تاہم اب ماہرین نے ایسا روبوٹ تیار کرلیا ہے جو خود کار طریقے سے ہر قسم کے شیشے کو صاف کرسکتا ہے۔
لموڈو ونڈو وزرڈ نامی یہ روبوٹ کمپیوٹر پروگرام کے ذریعے کام کرتا ہے اور اسے ریموٹ کنٹرول کے ذریعے بھی چلایا جاسکتا ہے۔
اس میں ایک طاقتور سکشن نظام نصب ہے جو کھڑکی سے مضبوطی سے چپک کر نہ صرف دھول مٹی بلکہ فنگس اور جراثیم کو بھی صاف کردیتا ہے۔ یہ روبوٹ اپنا کام نہایت خاموشی سے بغیر کوئی آواز پیدا کیے کرتا ہے۔
کام شروع کرنے سے قبل روبوٹ کے خود کار نظام میں شیشے کا ایک نقشہ سا بن جاتا ہے جس میں کناروں کا بھی تعین ہوجاتا ہے، یوں روبوٹ گرے بغیر کھڑکی کے تمام کناروں کو اچھی طرح صاف کردیتا ہے۔
ایک اسٹارٹ اپ کمپنی کی جانب سے بنائے گئے اس روبوٹ کے متعلق کمپنی کا دعویٰ ہے کہ یہ روبوٹ الرجی اور دیگر امراض کی وجہ بننے والے جراثیم کو بھی صاف کردیتا ہے۔
سکشن سسٹم اور ریموٹ کنٹرول سے چلنے کی صلاحیت کے علاوہ اس میں 30 منٹ کا بیٹری بیک اپ بھی ہے۔
اس وقت اس روبوٹ کے لیے فنڈنگ کی جارہی ہے اور جلد ہی اسے مارکیٹ میں پیش کردیا جائے گا۔
