لاہور : سفاری زو میں شیر کے 7 بچوں کی پیدائش ہوئی، جس کے بعد پارک میں شیروں کی تعداد بائیس سے بڑھ کر انتیس ہوگئی۔
تفصیلات کے مطابق لاہور کے رائیونڈ روڈ پر واقع وائلڈلائف سفاری پارک میں گزشتہ چند ہفتوں کے دوران شیر کے سات بچوں کی پیدائش ہوئی ہے ، تین مادہ شیرنیوں نے سات بچوں کو جنم دیا ہے۔
ایک کے ہاں تین جبکہ باقی دو نے دو،دو بچوں کو جنم دیا، ان نئے مہمانوں میں دو بچے سفید ہیں۔
لاہور سفاری زو کے ڈائریکٹر تنویر احمد جنجوعہ نے بتایا کہ تمام بچے صحت مند ہیں اور کافی اچھی بریڈ آئی ہے۔
سفاری زو حکام کے مطابق شیر کے بچوں کی پیدائش سے قبل رائل بنگال ٹائیگر کے بھی تین بچوں کی پیدائش ہوئی، جن کی عمر اب چند ہفتے ہوچکی ہے۔
نئے مہمانوں میں تین نر اور چار مادہ ہیں۔ لاہور سفاری پارک میں شیروں کی آبادی 22 سے بڑھ کر 29 ہوگئی ہے۔
ویٹرنری ماہرین کے مطابق بگ کیٹس کا یہ رویہ ہے کہ اگر انہیں اپنے نوزائیدہ بچوں میں کوئی نقص محسوس ہو تو مادہ انہیں قبول نہیں کرتی اور انہیں دودھ نہیں پلاتی، اس وجہ سے پھر ان بچوں کو مصنوعی دودھ پلایا جاتا ہے۔
