بوٹسوانا: افریقی جنگلوں میں رہنے والی بھینسوں نے شیروں سے بچنے کے لیے دریا میں چھلانگ لگائی تو پانی کے تیز بہاؤ کی وجہ سے وہ ڈوب کر ہلاک ہوگئیں۔
برطانوی خبررساں ادارے کی رپورٹ کے مطابق افریقی ممالک نمیبیا اور بوٹسوانا کے درمیان میں واقع دریا سے 400 بھینسوں کی لاشیں برآمد ہوئیں جو پانی میں ڈوب کر ہلاک ہوئیں۔
ابتدائی تفتیش میں یہ بات سامنے آئی کہ جنوبی افریقا میں واقع جنگلات میں رہنے والے خونخوار شیروں نے بھینسوں کے جھنڈ پر حملہ کیا جس سے بچنے کے لیے بھینسوں نے دریا میں چھلانگ لگائی۔
حکام کے مطابق جنگل کی مٹی پر شیروں کے پنجوں کے نشانات ہیں جس کا مطلب یہ کہ ایک ریوڑھ جنگلی بھنیسوں کے جھنڈ کا پیچھا کررہا تھا اسی وجہ سے انہوں نے دریا میں کود کر اپنی جان بچانے کی کوشش کی۔
بھینسوں کی بڑی تعداد کی وجہ سے بھگدڑ مچی اور وہ ایک دوسرے پر چڑھ دوڑی، پانی کے بہاؤ اور ڈوبنے کی وجہ سے وہ اپنا توازن کھو بیٹھیں اور ہلاک ہوگئیں۔
عینی شاہد نے برطانوی خبررساں ادارے سے گفتگو کرتے ہوئے بتایا کہ اُس نے کبھی بھی اتنی بڑی تعداد میں بھینسوں کو پانی میں کودتے ہوئے نہیں دیکھا، علاقے میں اس وجہ سے کافی شور بھی ہوا۔
بوٹسوانا کے ماحولیاتی وزیر مچیلٹی کا کہنا تھا کہ ’چوب دریا میں پانی کا بہاؤ تیز ہونے کی وجہ سے بڑی تعداد میں ہلاکتیں ہوئیں، ہم پانی کے اردگرد دیوار بنانے کی کوشش کررہے ہیں‘۔
اُن کا کہنا تھا کہ ہلاک ہونے والی بھینسوں کی لاشوں کو مقامی لوگوں نے قبضے میں لے کر گوشت استعمال کے لیے نکالنا شروع کردیا کیونکہ اس علاقے میں بہت زیادہ غربت ہے۔