غزہ میں ‘ بھوک ‘دہشت اور درندگی کا رقص جاری ہے اور والدین اپنے بچوں کو بھوک سے مرتا دیکھنے پر مجبور ہیں، ننھے فلسطینی نے دہائی دیتے ہوئے کہا کہ دودن سے بھوکا ہوں کھانا نہیں ملا تو مرجاؤں گا۔
تفصیلات کے مطابق غزہ میں اسرائیلی فوج کے انسانیت سوز حملوں کا سلسلہ جاری ہے، ہرطرف موت کے سائے ہیں اور جو بمباری سے بچ گئے، انہیں سردی اور بھوک جیسے کڑے امتحان کا سامنا ہے۔
ننھے فلسطینی بہن بھائی دنیا سے اپیل کر رہے ہیں کہ وہ دو دن سے بھوکے ہیں، کھانا نہیں ملا تو وہ مرجائیں گے۔
بے گھرفلسطینی خواتین کا کہنا ہے کہ کھانا ہے نہ پانی، بچوں کیلئے دودھ بھی نہیں، سرچھپانے کیلئے جگہ نہیں، بمباری سے نہیں مرے تو سردی اور بھوک سے مرجائیں گے۔
دوسری جانب عالمی اداروں کا کہنا ہے کہ غزہ میں اسرائیل کی ہولناک بمباری سے اشیا خورونوش کی شدید قلت ہے، بچوں کیلئے دودھ ہے اور نہ ہی کھانے کیلئے روٹی، لاکھوں افراد کھانے اور پانی سے محروم ہیں۔
ہزاروں بے گھرافراد اقوام متحدہ کی ایجنسی برائے خوراک کے سامنے جمع ہوگئے ہیں۔
