واشنگٹن: امریکی وزیر دفاع لائیڈ آسٹن بیمار پڑ گئے ہیں لیکن ان کی بیماری اور اسپتال داخل ہونے کی خبر کئی دن بعد سامنے لائی گئی ہے۔
غیر ملکی میڈیا رپورٹس کے مطابق امریکی وزیر دفاع لائیڈ آسٹن طبی پیچیدگیوں کے سبب رواں ہفتے اسپتال میں داخل رہے، پینٹاگون نے جمعہ کو بتایا کہ لائیڈ آسٹن کو یکم جنوری کو والٹر ریڈ نیشنل ملٹری میڈیکل سینٹر میں داخل کروایا گیا تھا۔
لائیڈ آسٹن کے علاج معالجے سے متعلق پنٹاگون ترجمان نے کسی قسم کی کوئی تفصیلات نہیں بتائیں، کہ آیا وہ پہلے بھی بے ہوش ہو چکے تھے یا نہیں، تاہم صرف اتنا کہا گیا کہ لائیڈ آسٹن اب رو بہ صحت ہیں، اور امید ظاہر کی گئی کہ وہ آج اپنی ذمہ داریاں سنبھال لیں گے۔
Defense Sec. Lloyd Austin has been hospitalized since New Year’s Day but the Biden admin didn’t disclose it until tonight.
Biden admin "refuses to say how serious his condition was or why he was not able to perform his duties.”pic.twitter.com/ChfSfktNcv
— Citizen Free Press (@CitizenFreePres) January 6, 2024
واضح رہے کہ 70 سالہ لائیڈ آسٹن چین آف کمانڈ میں امریکی صدر کے بعد آتے ہیں۔ سی این این کے مطابق پینٹاگون نے بتایا کہ سیکریٹری دفاع کو ایک ایسی سرجری کے لیے داخل کیا گیا تھا جو ضروری تو تھی لیکن انھوں نے اسے ملتوی کر رکھا تھا جس کی وجہ سے پیچیدگی ہو گئی تھی۔
پینٹاگون نے آسٹن کو ابتدائی طور پر داخل کیے جانے کے 4 دن بعد اس کا اعلان کیا، جب کہ پینٹاگون کے پریس سیکریٹری میجر جنرل پیٹ رائڈر نے جمعرات کو ایک نیوز بریفنگ میں اسپتال میں داخل ہونے کا کوئی ذکر نہیں کیا تھا۔
یہ پوچھے جانے پر کہ پینٹاگون نے آسٹن کے اسپتال میں داخل ہونے کے بارے میں عوام کو مطلع کرنے کے لیے چار دن انتظار کیوں کیا؟ پریس سیکریٹری رائیڈر نے بتایا کہ صورت حال بار بار بدل رہی تھی، اور پھر طبی مسائل اور ذاتی راز داری سمیت کئی عوامل تھے جس کی وجہ سے ایسا کرنا پڑا۔
