لاہور : ملک بھر میں جاری بجلی کی غیر اعلانیہ لوڈ شیڈنگ کو لاہور ہائیکورٹ میں چیلنج کر دیا گیا۔
تفصیلات کےمطابق لاہور ہائی کورٹ میں ملک بھر میں جاری بجلی کی غیر اعلانیہ لوڈ شیڈنگ کیخلاف درخواست دائر کردی گئی۔
جوڈیشل ایکٹو ازم پینل کی جانب سے اظہر صدیق ایڈووکیٹ نے درخواست دائر کی، درخواست میں موقف اختیار کیا گیا کہ لاہور سمیت صوبہ بھر میں بجلی کی غیر اعلانیہ لوڈ شیڈنگ ہو رہی ہے۔
درخواست گزار نے کہا کہ بجلی کی غیر اعلانیہ لوڈ شیڈنگ سے نظام زندگی مفلوج ہو گئی ہے، بجلی کے بلوں کی مد میں بھاری رقوم صارفین سے وصول کی جا رہی ہیں، اس لیے لوڈشیڈنگ کا کوئی جواز نہیں ہے۔
.
درخواست میں استدعا کی گئی کہ فوری غیر اعلانیہ لوڈ شیڈنگ ختم کرنے کا حکم دیا جائے اور آٸین کے مطابق عوام کو ریلیف دیا جاٸے۔
خیال رہے ملک بھر میں بجلی کی کئی کئی گھنٹے لوڈ شیڈنگ جاری ہے، شدیدگرمی میں عوام کا جینا محال ہو چکا ہے۔
شہروں میں 6 سے 8 جب کہ دیہات میں 10 سے 12 گھنٹے بجلی غائب ہوتی ہے، کے الیکٹرک نے بھی لوڈ شیڈنگ کا دورانیہ بڑھا کر 15 گھنٹے کر دیا، بعض علاقوں میں دورانیہ اٹھارہ گھنٹے تک بڑھا دیا گیا ہے۔
