کراچی: شہرقائد کے شہری عید کے ایام بھی لوڈ شیڈ نگ سے نہ بچ سکے، شہر کے مختلف علاقوں میں غیر اعلانیہ لوڈ شیڈنگ کا سلسلہ جاری ہے۔
تفصیلات کے مطابق وزیر اعظم عمران خان کے خصوصی احکامات کے بعد بھی کے الیکٹرک نے اپنی روش برقرار رکھی اور عید کے پہلے روز کی طرح دوسرے روز بھی شہر کے کئی علاقے بجلی سے محروم ہیں۔
ذرائع کا کہنا ہے کہ ناظم آباد، نارتھ ناظم آباد، شادمان ٹاؤن نمبردو، ملیر ماڈل کالونی، معین آباد اور ٹی این ٹی کالونی میں بجلی کی لوڈ شیڈنگ جاری ہے، طویل غیراعلانیہ لوڈشیڈنگ سے مختلف علاقوں میں پانی کی قلت کا بھی سامنا ہےجس سے شہری شدید پریشان ہیں۔
گلزارہجری میں صبح سےبجلی کی فراہمی بند ہے جبکہ طارق بن زیاد سوسائٹی اورملیرہالٹ میں بھی صبح سےبجلی غائب ہے۔
شہریوں کا کہنا ہے کہ پانی اور بجلی ویسے تو انسان کی بنیادی ضروریات ہیں لیکن عید اور تہوار کے موقع پر ان دونوں کی موجودگی لازمی ہوتی ہے ، بصورت دیگر مہمان نوازی جو کہ ہماری روایات کا حصہ ہے ، اس میں خلل پڑتا ہے اور بے سبب مہمانوں کے سامنے شرمندگی جھیلنا پڑتی ہے۔
دوسری جانب کے الیکٹرک انتظامیہ نے لوڈ شیڈنگ پر روایتی موقف اختیار کرتے ہوئے کہا ہے کہ لوڈ شیڈنگ نہیں کی جارہی ، فالٹ ہے جسے درست کیا جارہا ہے۔
یا درہے کہ وزیر اعظم نے بجلی کے تقسیم کا راداروں کو ہدایت کی تھی کہ ماہ رمضان اور عید الفطر پر ملک میں لوڈ شیڈنگ نہیں کی جائے ، عید پر انہوں نے وفاقی وزیر توانائی عمر ایوب اور سیکرٹری توانائی عرفان علی کو مبارک باد بھی دی تھی کہ ماہ رمضان میں لوڈ شیڈنگ نہ کرکے ان کی حکومت میں پاکستان کا پہلا لوڈ شیڈنگ فری رمضان گزارا گیا ہے۔
تاہم شہر قائد کے کئی علاقوں کے رہائشی ماہ رمضان میں بھی لوڈ شیڈنگ کی شکایت کرتے نظر آئے اور عید پر بھی ان کی مشکلات ختم نہ ہوسکیں، کے الیکٹر ک کے ہاتھوں اعلانیہ اور غیر اعلانہ لوڈ شیڈنگ کا سلسلہ نئے پاکستان میں بھی مسلسل جاری ہے۔
