کراچی: بلدیہ وسطی میں عیدالاضحی پر آلائشیں ٹھکانے لگانے کے لیے لائحہ عمل تیار کرلیا گیا، عید کے پہلے دن سے عمل درآمد ہوگا۔
تفصیلات کے مطابق عیدالاضحی اور مون سون کی بارشوں کی صورتحال سے نمٹنے کے حوالے سے بلدیہ وسطی کے مرکزی آفس میں اجلاس ہوا، ہنگامی اجلاس میں چیئرمین بلدیہ وسطی ریحان ہاشمی، وائس چیئرمین بلدیہ وسطی سید شاکر علی اور میونسپل کمشنر بلدیہ وسطی محمد فہیم خان سمیت دیگر بلدیاتی افسران بھی موجود تھے۔
اجلاس میں عیدالاضحی کے موقع صفائی ستھرائی کے بہتر انتظامات اور مون سون کی بارشوں کی صورتحال سے نمٹنے کے لئے انتظامات کو حتمی شکل دی گئی۔
بلدیہ وسطی کے چاروں زونز میں ٹریکٹر ٹرالی، ڈمپرز، لوڈرز اور افرادی قوت کے ذریعے آلائشیں اٹھانے اور ٹھکانے لگانے کے انتظامات زیرِ غور آئے۔
چیئرمین بلدیہ وسطی ریحان ہاشمی نے اجلاس میں گفتگو کرتے ہوئے کہا کہ عوام کی بہتر خدمت منتخب نمائندے ہی کرسکتے ہیں، اگرتمام ادارے باہمی کوآرڈینیشن سے خدمات انجام دیں تو کسی بھی صورتحال سے بہ احسن وخوبی نمٹا جاسکتا ہے۔
چیئرمین بلدیہ وسطی نے عید الضحیٰ کے حوالے سے کئے جانے والے انتظامات کے بارے میں آگاہ کرتے ہوئے کہا کہ عید گاہوں، مساجد اور امام بارگاہوں کے راستوں پر اور اطراف میں صفائی کے ساتھ چونے کے چھڑکاﺅ کیا جائے گا اور بلدیہ وسطی کی جانب سے ضلع وسطی کی ہر یوسی میں خصوصی کیمپس قائم کئے جائیں گے۔
ریحان ہاشمی کا مزید کہنا تھا کہ آلائشوں کو دفن کرنے کے لئے بلدیہ وسطی کی جانب سے ضلع وسطی میں بلاک ڈی نارتھ ناظم آباد ،جام چاکرو میں خندقیں کھودی گئی ہیں اور ان خندقوں کے ساتھ ڈائی ورژن پمپ کا انتظام کیا گیا ہے تاکہ بارش کی صورت میں خندقوں سے فوری طور پر پانی نکالا جاسکے۔
