لندن: قائد مسلم لیگ (ن) میاں نواز شریف نے ملک میں مہنگائی کی وجہ بننے والے عناصر کے خلاف کارروائی کا مطالبہ کردیا ہے۔
تفصیلات کے مطابق لندن میں حسن نواز کے دفتر کے باہر میڈیا سے گفتگو کرتے ہوئے نواز شریف نے کہا کہ پاکستان میں حالیہ مہنگائی نے غریب کا جینا دوبھر کردیا ہے، جو ملک میں مہنگائی کی وجہ جانتا ہے وہ میری ٹوئٹ پڑھ لے۔
نوازشریف نے کہا کہ مہنگائی کرنے والے اور اس کی وجہ بننے والوں کے خلاف سخت کارروائی ہونی چاہئے۔
اس سے قبل سابق وزیراعظم اپنے بیٹے حسن نواز کے دفتر سے جیسے ہی باہر نکلے تو پی ٹی آئی کارکنان نے احتجاج شروع کردیا اسی دوران موقع پر موجود مسلم لیگ (ن) کے کارکنان نے بھی جوابی نعرے بازی شروع کردی۔
دونوں سیاسی جماعتوں کے کارکنان آمنے سامنے آنے کی وجہ سے وہاں تلخی کا ماحول پیدا ہوا جس کے باعث نواز شریف نے مختصر تقریر کی اور وہاں سے روانہ ہوگئے۔
