لندن: برطانیہ کے دارالحکومت لندن میں چاقو کے وار سے تین شہری زخمی ہوگئے، ایک شخص کو گرفتار کرلیا گیا۔
تفصیلات کے مطابق لندن میں تین مختلف واقعات میں چاقو کے وار سے تین شہری زخمی ہوگئے، ایک شخص کی حالت تشویشناک بتائی جارہی ہے، ایک شخص کو حراست میں لے لیا گیا۔
سترہ سالہ لڑکے کو شمالی لندن میں چاقو کے وار سے نشانہ بنایا گیا، جو اسپتال میں زندگی اور موت کی کشمکش میں مبتلا ہے، لندن کے ساؤتھ ویل روڈ پر 20 سالہ لڑکے پر بھی چاقو سے حملہ کیا گیا اس کے جسم کے مختلف حصوں پر چاقو سے وار کیا گیا تاہم اسپتال انتظامیہ کے مطابق اس کی حالت خطرے سے باہر ہے۔
برطانوی میڈیا کے مطابق ایک اور شخص پر بھی چاقو سے حملہ کیا گیا، جسے فوری طور پر اسپتال منتقل کردیا گیا جہاں اسے طبی امداد دی جارہی ہے، تمام وارداتیں 6 سے 8 بجے درمیان پیش آئیں۔
اسکاٹ لینڈ یارڈ پولیس کا کہنا ہے کہ ساؤتھ ویل روڈ سے ایک شخص کو حراست میں لیا ہے تاہم بقیہ دونوں وارداتوں کے حوالے سے کچھ کہنا قبل از وقت ہوگا۔
واضح رہے کہ لندن کے شمال میں واقع ٹیوب اسٹیشن کے قریب چاقو بردار کے حملے میں ایک 30 سالہ شہری شدید زخمی ہوگیا تھا جیسے فوری طور پر اسپتال منتقل کیا گیا تاہم وہ جانبر نہ ہوسکا۔
خیال رہے کہ رواں سال برطانیہ میں چاقو زنی کی وارداتوں میں رواں سال اضافہ دیکھنے میں آیا ہے اور متعدد افراد اپنی جان سےجا چکے ہیں جبکہ کئی زخمی بھی ہوئے ہیں۔
