برطانیہ کے مصروف ترین ہیتھرو ایئرپورٹ کو آج 24 گھنٹے کے لیے بند کر دیا گیا ہے مسافروں سے ایئرپورٹ نہ آنے کی درخواست کی گئی ہے۔
غیر ملکی میڈیا کے مطابق جمعہ کی صبح ایک سب اسٹیشن میں آتشزدگی کے باعث ہیتھرو ایئرپورٹ کو 24 گھنٹے کے لیے مکمل طور پر بند کر دیا گیا ہے۔
رپورٹ کے مطابق یہ آغ لندن کے مغرب میں واقع ایئرپورٹ کو بجلی فراہم کرنے والے اسٹیشن میں لگی جس کی وجہ سے ایئرپورٹ کو بجلی کی فراہمی معطل ہوگئی۔
اس حوالے سے ایئرپورٹ انتظامیہ کی جانب سے جاری بیان میں ہوائی اڈے کی 24 گھنٹے بندش کی اطلاع دیتے ہوئے کہا گیا ہے کہ مسافروں اور ساتھیوں کی حفاظت یقینی بنانے کے لیے ہیتھرو ایئرپورٹ 21 مارچ کو بند رہے گا۔
ایئرپورٹ انتظامیہ کی جانب سے جاری اعلامیے میں اس حوالے سے مسافروں سے معذرت طلب کرتے ہوئے انہیں ایئرپورٹ نہ آنے کا مشورہ دیا گیا ہے اور مزید معلومات کے لیے اپنی ایئر لائن سے رابطہ کرنے کی ہدایت کی گئی ہے۔
