واشنگٹن : ایک رپورٹ کے مطابق دنیا بھر میں بوڑھے افراد بتدریج تنہائی کا شکار ہو رہے ہیں اور یہ صورت حال ان کی صحت اور زندگی کے لیے شدید خطرناک ثابت ہوسکتی ہے۔
ایک تحقیق میں خبردار کیا گیا ہے کہ جو لوگ تنہا رہتے ہیں ان میں فالج اور کینسر سے مرنے کا خطرہ زیادہ ہوتا ہے۔
خود کو لوگوں سے دور کرلینا یا الگ تھلگ رہنا تنہائی یا اکیلاپن کہلاتا ہے، لیکن کیا آپ نے کبھی یہ سوچا ہے کہ یہ تنہائی صحت کے حوالے سے نقصان پہنچا سکتی ہے یہ انسان کو ڈپریشن کا مریض بھی بنا سکتی ہے۔
ایک طویل مگر منفرد تحقیق سے معلوم ہوا ہے کہ تنہائی کے شکار افراد میں دیگر امراض کی طرح فالج کے شکار ہونے کے امکانات بھی بڑھ جاتے ہیں۔
تنہائی کے شکار افراد یا کسی بھی فرد کے سماجی بائیکاٹ سے اس کی صحت پر سنگین اثرات مرتب ہوتے ہیں۔
ماضی میں کی جانے والی تحقیقات میں تنہائی کے شکار افراد میں امراض قلب اور شوگر جیسی بیماریاں بھی ہونے کا انکشاف سامنے آیا تھا۔
اب امریکی ماہرین کی جانب سے کی جانے والی تحقیق سے معلوم ہوا ہےکہ تنہائی سے فالج ہونے کے امکانات بھی نمایاں طور پر بڑھ جاتے ہیں اور اگر زیادہ عرصے تک تنہائی کی زندگی گزاری جائے تو فالج کے امکانات دگنے ہوجاتے ہیں۔
امریکی نشریاتی ادارے سی این این کے مطابق امریکی ماہرین نے 2006 سے 2018 تک 12 ہزار افراد پر تحقیق کی اور ماہرین نے درمیان میں رضاکاروں کی صحت جانچنے سمیت ان سے مختلف سوالات بھی کیے۔ تحقیق میں شامل زیادہ تر افراد کی عمر 50 سال تک تھی اور اس میں نصف خواتین بھی شامل تھیں۔
ماہرین نے پایا کہ ایک دہائی کے دوران جن افراد نے تنہا زندگی گزاری یا جنہیں اہل خانہ یا دوستوں سمیت دوسرے افراد نے نظر انداز کیا اور ان کی تنہائی طویل عرصے تک رہی، انہیں سنگین فالج کے حملوں کا سامنا کرنا پڑا۔
