راولپنڈی : پاکستان کی مسلح افواج میں شامل اقلیتی برادری کی وطن عزیزکیلئے قربانیاں بھی کسی سے کم نہیں ، اقلیتی جانثاروں کی ایک طویل فہرست ہے۔
تفصیلات کے مطابق پاکستان میں بسنے والے کسی بھی قوم، عقیدے،مذہب یاذات سےتعلق رکھتےہوں لیکن جب دفاع وطن کامرحلہ آتاہےتوسب یکجان ہوکرسیسہ پلائی دیواربن جاتےہیں، افواج پاکستان میں اقلیتی جانثاروں کی ایک طویل فہرست ہے، جنہوں نےدفاع وطن کیلئےکسی بھی قربانی سےدریغ نہیں کیا۔
1948 کی کشمیر جنگ میں لانس نائیک یعقوب مسیح نے کیپٹن سرورشہید کے ہمراہ اڑی سیکٹر میں تلپترا پہاڑی کوفتح کےبعدسبزہلالی پرچم لہرایا ، اس پرچم کےسائےمیں لانس نائیک یعقوب مسیح نےاپنی جان پاکستان کی خاطرقربان کردی۔
اسکواڈرن لیڈرپیٹرکرسٹی پاک فضائیہ کےنامور پائلٹ تھے، جنہوں نے 1965اور1971کی جنگوں میں کارہائے نمایاں سرانجام دیئے۔
1971کی جنگ میں اسکواڈرن لیڈرپیٹرکرسٹی کو بھارتی فضائی اڈے جمنانگر کو تباہ کرنے کا ہدف دیا گیا ، اسکواڈرن لیڈرپیٹرکرسٹی اپنےساتھی اسکواڈرن لیڈرخسروکےہمراہ مشن مکمل کرنےکےبعدواپس آرہےتھے کہ ایک بھارتی میزائل ان کے طیارے کو آ لگا جس سے مسیحی برادری کایہ پائلٹ وطن عزیزکی خاطر قربان ہوگیا، پیٹر کرسٹی کو ان کی بہادری کےاعتراف میں تمغہ جرأت عطا کیا گیا۔
مسیحی برادری سے تعلق رکھنے والےونگ کمانڈر مارون لیسلے1965اور1971کی جنگ میں دفاع وطن میں پیش پیش رہے ، 1971کی جنگ میں ونگ کمانڈرمارون لیسلےکوان کی بہادری اورپیشہ وارانہ ذمہ داریوں کےوجہ سے محافظ کراچی کا خطاب بھی دیا گیا۔
12دسمبر1971میں ونگ کمانڈرمارون لیسلے کو امرتسر ریڈار تباہ کرنےکاہدف دیاگیا، جس کومکمل کرکے لوٹتےہوئےدشمن کی جانب سےفائرکیاگیامیزائل ان کےجہازمیں لگا، بھارتی فضائیہ کے مطابق وہ پیر اشوٹ کےذریعے جہاز سے سمندر میں آگرے اپنی جان دیکر پاکستان پرقربان ہو گئے، ونگ کمانڈر مارون لیسلے کو ان کی بہادری کے اعتراف میں دو مرتبہ ستارہ جرأت عطا کیا گیا۔
مسیحی برادری کےایک اور دلیرسپاہی سکینڈ لیفٹیننٹ ڈینیل نےمشرقی پاکستان میں شجاعت کی داستان لکھی ، سکینڈلیفٹیننٹ ڈینیل کےسینےمیں 3 گولیاں لگیں جنہیں آپریشن کے ذریعے نکالا گیا ، ان کاکہنا تھا یہ گولیاں میری ماں کویادگار کےطور پردےدینااورپھر جان مادروطن پر قربان کردی۔
اس کے علاوہ کیپٹن مائیکل ولسن1971میں چھمب سکیٹر میں تعینات تھے،دشمن سےلڑتےہوئےگولیوں کی بوچھاڑمیں جان قربان کردی۔
