کراچی: آج رواں سال 2025 کا طویل ترین دن اور مختصر ترین رات ہوگی۔
ماہر فلکیات کا کہنا ہے کہ آج دن 13 گھنٹے 41 منٹ کا ہوگا، جب کہ رات 10 گھنٹے 19 منٹ کی ہوگی، یکم جولائی کے بعد دن کا دورانیہ بتدریج کم ہونا شروع ہو جاتا ہے۔
ماہر فلکیات کے مطابق 22 ستمبر کو دن اور رات کا دورانیہ تقریباً برابر ہو جاتا ہے۔
ادھر آج کراچی میں صبح سویرے ہلکی بوندا باندی کے بعد موسم خوش گوار ہو گیا ہے، محکمہ موسمیات کے مطابق شہر کا موسم ابر الود رہے گا، جب کہ دن کے اوقات میں بھی ہلکی بوندا باندی کا امکان ہے۔
لاہور میں بادلوں نے ڈیرے ڈال دیے ہیں، ہوا چلنے سے گرمی کی شدت میں کمی آ گئی ہے، راولپنڈی، اسلام آباد اور گرد و نواح میں رات گئے بارش سے گرمی کا زور ٹوٹ گیا۔
محکمہ موسمیات نے آئندہ چوبیس گھنٹوں کے دوران لاہور، سرگودھا، فیصل آباد، جھنگ، سیالکوٹ، نارووال، ہری پور، ایبٹ آباد، مانسہرہ، پشاور، صوابی، مردان میں بارش کی پیشگوئی کی ہے، کشمیر اور گلگت بلتستان میں بھی گرج چمک کے ساتھ باش کا امکان ہے۔
